Գորիկ Հակոբյանը կոչ է անում զերծ մնալ իշխանություններին ուժով տապալելու անպատասխանատու կոչերից. «Արմենպրես»
Հայաստանի Հանրապետության Ազգային անվտանգության ծառայության տնօրեն Գորիկ Հակոբյանը մի շարք գործիչների կոչ է անում զերծ մնալ ապստամբությունների, իշխանություններին ուժով հեռացնելու անպատասխանատու կոչերից:
Ազգային անվտանգության ծառայության մասնագիտական տոնի կապակցությամբ անցկացվող հանդիսավոր նիստի ընթացքում ունեցած ելույթում Գորիկ Հակոբյանն ընդգծեց, որ բոլորի համար ակնհայտ է, թե ինչպիսի ողբերգական իրադարձությունների հանգեցրեց այսպես կոչված «գունավոր հեղափոխությունների» ալիքը՝ ընդգծելով, որ այդ դաժան փորձությունն անցած ժողովուրդները դեռ երկար տարիներ չեն կարողանալու հաղթահարել քաղաքացիական պատերազմների, սոցիալ-տնտեսական և հումանիտար ճգնաժամերի կործանարար հետևանքները:
«Ցավոք, մեր ժողովրդին նույնպես վիճակվեց հասարակության բևեռացումը, անհանդուրժողականությունը, անթաքույց չարությունն ու կույր ատելությունը: Իրավիճակը կայունացնելու և բնականոն հունի բերելու համար գերագույն ջանքեր պահանջվեցին: Այդ դեպքերից անհրաժեշտ դասեր չքաղած մերօրյա որոշ գործիչներ փորձում են հանրության մի մասը կրկին ներքաշել արկածախնդրության հորձանուտ, հնչեցնում են ապստամբությունների, իշխանություններին ուժով տապալելու անպատասխանատու կոչեր»,- «Արմենպրես»-ի հաղորդմամբ՝ նշեց Հակոբյանը:
Նա ընդգծեց, որ Ազգային անվտանգության մարմինները չեն պատրաստվում որպես կողմնակի դիտորդ հետևել այս իրադարձություններին: «Մեր կողմից կձեռնարկվեն անհրաժեշտ բոլոր միջոցները հանրապետության սահմանադրական կարգի խախտմանն ուղղված հակաօրինական ցանկացած դրսևորում վճռականորեն կանխելու համար: Սա սպառնալիք չէ, սակայն նախազգուշացնելու անհրաժեշտությունը մենք տեսնում ենք»,- հայտարարեց ՀՀ ԱԱԾ տնօրենը:
Երկիմաստ մեկնաբանությունների և տարաբնույթ շահարկումների տեղիք չտալու համար Գորիկ Հակոբյանը շեշտեց, որ այլակարծության, ընդդիմախոսության, կուսակցական ազատ մրցակցության, բողոքի արտահայտման իրավունքները ժողովրդավարական հիմնարար արժեքներ են և չեն կարող կամայականորեն արգելվել կամ սահմանափակվել: «Սակայն քաղաքացիների իրավունքները հստակ սահմանազատված են ամենաթողությունից, անարխիայից, քաղաքական ծայրահեղականությունից: Քաղաքական գործունեությունում ուժային մեթոդներ կիրառելու, զանգվածային անկարգություններ ու բախումներ հրահրելու սադրանքներին մենք հակադրելու ենք միայն օրենքի ուժը»,- շեշտեց Գորիկ Հակոբյանը:
ՀՀ ԱԱԾ տնօրենն անդրադարձավ նաև սփյուռքահայությանն ընդդիմության ազդեցության ոլորտ ներքաշելու, այդ նպատակով արտերկրի հայկական համայնքներում շտաբեր ձևավորելու մտադրություններին՝ ընդգծելով, որ այդ նախաձեռնությունն իրականացնելու դեպքում ապակառուցողական հեռահար հետևանքներն ակնհայտ են: «Հայաստանի անկախ պետականությքան ամբողջ ժամանակահատվածում միայն համայն հայության՝ Հայաստան-Արցախ-Սփյուռք հավաքական համախմբմամբ է հնարավոր եղել նշանակալի նվաճումներ արձանագրել: Այնինչ, սփյուռքահայության միջավայր ներքաղաքական խնդիրների տեղափոխումը պառակտման իրական պայմաններ կստեղծի թե’ հայ համայնքներում, թե’ Հայաստան-Սփյուռք կապերում: Այդպիսի հնարավոր զարգացումների ազդեցությունը հայ ժողովրդի առաջընթացի, Հայաստանի տնտեսական աճի, արտաքին քաղաքական նպատակների առաջխաղացման համար խիստ անբարենպաստ են լինելու: Եվ, վերջապես, հարկավոր է ընդունել, որ ներքաղաքական պայքարին պետք է մասնակցեն Հայաստանի քաղաքացիները, իսկ օտարերկրացիները, անկախ նրանց ազգային պատկանելիությունից, այս ոլորտում անելիք չունեն»,- նշեց ՀՀ ԱԱԾ տնօրենը:
Մանրամասներն՝ սկզբնաղբյուր կայքում:
