ԼՂՀ ոտիկանությունում ճշգրտել են ընտրացուցակները
Երեկ՝ դեկտեմբերի 15-ին, ԼՂՀ ոստիկանության պետի տեղակալ-շտաբի պետ¸ ոստիկանության գնդապետ Բորիս Ենգիբարյանը խորհրդակցություն է անցկացրել ԼՂՀ ոստիկանության անձնագրային և վիզաների բաժնի¸ ինչպես նաև ոստիկանության տարածքային ստորաբաժանումների անձնագրային ծառայությունների պատասխանատուների հետ։
Ինչպես փոխանցեցին ԼՂՀ ոստիկանության մամլո ծառայությունից, օրակարգը ներառում էր «ԼՂՀ ոստիկանության անձնագրային ծառայությունների կողմից կազմված հետախուզական գործերի կազմակերպման գործընթացը»¸ ինչպես նաև «Ընտրացուցակների ճշգրտման վերաբերյալ կատարված աշխատանքների մասին տեղեկանքի քննարկումը»:
Հիմնական զեկույցով հանդես է եկել ԼՂՀ ոստիկանության անձնագրային և վիզաների բաժնի պետ¸ ոստիկանության գնդապետ Գարրի Միրզոյանը։
Առաջացած հարցերի և կատարվելիք միջոցառումների մասին ելույթներ են ունեցել նաև ոստիկանության տարածքային ստորաբաժանումների անձնագրային ծառայությունների պատասխանատուներն¸ ովքեր հավաստիացրել են¸ որ ուժեղացված ծառայության արդյունքում այսօր արդեն հաջողել են ամբողջությամբ ճշգրտել ընտրացուցակները։
ԼՂՀ ոստիկանության պետի տեղակալ-շտաբի պետ¸ ոստիկանության գնդապետ Բորիս Ենգիբարյանը զեկույցները լսելուց հետո առավել մանրամասն կանգ է առել ոստիկանության տարածքային ստորաբաժանումների անձնագրային ծառայությունների արդյունավետության բարձրացման հարցերին` հանձնարարելով շարունակել թափանցիկ գործելաոճը՝ յուրաքանչյուր քաղաքացու հանդեպ ցուցաբերելով հոգածություն և զերծ պահել նրանց ավելորդ քաշքշուկներից։
Artsakhpress.am
