Հայտարարություն Գայանե Առուստամյանի նկատմամբ հարձակման վերաբերյալ

Ազգային ժողովում ԵՏՄ պայմանագրին միանալու մասին փաստաթղթի վավերացման դեմ հանրային բողոքի գործողությունների ռազմավարությունը քննարկելու նպատակով դեկտեմբերի 1-ին ՀՌԱԱՀ գրասենյակում հավաքված մի շարք հասարակական կազմակերպությունների, կուսակցությունների ներկայացուցիչների եւ անհատ քաղաքացիների ներկայությամբ ազգայնական «Հայազն» կուսակցության վարչության անդամ Արմեն Հովհաննիսյանը` ԵՄ դրոշով ակցիային մասնակցելու առաջարկությամբ հանդես գալու համար՝ լրագրող, հասարակական ակտիվիստ Գայանե Առուստամյանի հասցեին նախ սեռական բռնության սպառնալիք և հայհոյանքներ է հնչեցրել, այնուհետև տեղից վեր է կացել և հարձակվել նրա վրա: Գայանե Առուստամյանը հարկադրված է եղել դիմելու ինքնապաշտպանության, իսկ Արմեն Հովհաննիսյանը և նրա կուսակիցները դուրս են հրավիրվել տարածքից։

Քաղաքակիրթ և ժողովրդավարական արժեքներ կրող հանրույթների շրջանակներում յուրաքանչյուր ոք ազատ է իր երկրի Սահմանադրությամբ եւ օրենքներով, ինչպես նաեւ Մարդու իրավունքների եվրոպական հռչակագրով ընձեռնված իրավունքների շրջանակում արտահայտելու իր մտքերն ու դիմելու իր իրավունքներն իրացնելու նպատակ հետապնդող մեթոդների: Ուստի կենցաղային բնույթ կրող եւ/կամ հանրային ավանդույթի շրջանակում գործող չգրված որեւէ օրենք կամ հասկացություն չի կարող պատճառ հանդիսանալ արդարացնելու «Հայազն»֊ի անդամի վարքագիծը, որը ոչ միայն բնութագրվում է որպես քրեորեն պատժելի` խուլիգանական գործողություն, այլեւ ակնհայտ ոտնձգություն է ՀՀ քաղաքացիների մտքի, խղճի, ու մարդու այլ իրավունքների ու հիմնարար ազատությունների նկատմամբ:

ՀՀ ազատ քաղաքացու նկատմամբ` ազգայնական «Հայազն» կուսակցության անդամի հակաօրինական գործողություններին ականատես կազմակերպությունների ներկայացուցիչներին և անհատներին ու նրանց ղեկավար մարմիններին կոչ ենք անում գնահատական տալ եւ դատապարտել Արմեն Հովհաննիսյանի արարքը:

Իսկ մենք՝ ներքոստորագրյալներս, դեկտեմբերի 1-ին ՀՌԱԱՀ գրասենյակում Գայանե Առուստամյանի ազատ կամքի, պատվի ու արժանապատվության, գաղափարների իրացման նկատմամբ բռնանալու փորձ եւ խուլիգանական հարձակում իրականացրած Արմեն Հովհաննիսյանի արարքը համարում ենք Հայաստանում մարդու իրավունքների դեմ ուղղված բացահայտ ոտնձգություն, դատապարտում ենք եւ հայտարարում, որ Արմեն Հովհաննիսյանին պատասխանատվության չկանչելու պարագայում բռնություն քարոզող եւ ցուցադրող կուսակցության «առաջնորդի» վարքագիծը կարող է դառնալ չափանիշ եւ ծառայել որպես անհանդուրժողականության օրինակ` նրա հետեւորդների համար:

Զարուհի Հովհաննիսյան

Աննա Շահնազարյան

Լալա Ասլիկյան

Անտոն Իվչենկո

Արման Ղարիբյան

Դավիթ Ամիրյան

Լառա Ահարոնյան

Աննա Նիկողոսյան

Սեդրակ Բաղդասարյան

Նվարդ Մարգարյան

Պերճուհի Կաժոյան

Արտակ Զեյնալյան, «Իրավունքի գերակայություն» Իրավապաշտպան հ/կ