Վարսակը` որպես դեղամիջոց
Բուժիչ նամակներ
Վարսակը հնագույն ժամանակներից օգտագործվել է բազմաթիվ հիվանդությունների բուժման համար։ Ընդ որում, ոչ միայն հատիկը, այլ նաև դրանից ստացված ձավարը, ալյուրը և վերգետնյա մասը, որը հավաքում են բույսի աճի տարբեր փուլերում։ Մեծ կիրառում ունի նաև բույսի չորացրած խոտը։ Վարսակի հատիկում հրաշալի ձևով հավասարակշռված են սպիտակուցները 11-18 %, ճարպերը (4-6,5%) և օսլան (մոտ 40 %)։ Հարուստ է B խմբի վիտամիններով, պարունակում է խոլին, միկրո և մակրոտարրեր։
Վարսակը հրաշալի աբսորբենտ է, մաքրում է օրգանիզմը թույներից և հեռացնում դրանք։
Բույսի նման հատկությունը թույլ է տալիս մաքրել աղիները, լյարդը և այլ օրգանները։
Վարսակն ունի նյութափոխանակությունը կարգավորող հատկություն, ամրացնում է օրգանիզմի դիմադրողականությունը, մասնակցում է արյունաստեղծման գործընթացին, կանոնավորում է սրտի ռիթմերը։ Գիտական բժշկությունը կիրառում է վարսակի խիստ եփուկն ասթենիայի` օրգանիզմի հյուծվածության, այրվածքների և ճառագայթման, վիրուսային հեպատիտի, ստամոքսաբորբի, կոլիտների, ստամոքսի և 12-մատնյա աղիի խոցի դեպքում։ Վարսակի խոշոր աղացած ալյուրը կիրառվում է երկաթի պակասության հետևանքով առաջացած անեմիայի բուժման համար։ Վարսակը լայնորեն կիրառվում է էկզեմայի, քրոնիկ մաշկաբորբի և դիաթեզի դեպքում։
Ժողովրդական դեղատոմսեր
Լյարդի մաքրում. Մեկ և կես լիտր սառը ջրի մեջ դրեք որևիցե արծաթյա իր, 10 ժամ պահեք մութ տեղում, 15-20 րոպե եռացրեք, հանեք արծաթյա իրը, լցրեք 150 գ վարսակի հատիկ։ Կրկին 15 րոպե եփեք, 2 ժամ թրմեք, քամեք։ Խմեք 300-ական մլ` օրը 3-4 անգամ, ուտելուց 30 րոպե առաջ։ Շարունակեք 15 օր։
Շաքարային դիաբետ. 150 գ վարսակի փաթիլները 1-2 րոպե եփեք 1 լ եռջրում թույլ կրակի վրա, ծածկեք սրբիչով, 1 ժամ հետո քամեք։ Եփուկը խառնեք ալոճի հյութի հետ (1։1)։ Խմեք 200-ական մլ, օրը 3-4 անգամ, շարունակեք 40-60 օր։
Լեղամուղ. Վարսակի հատիկը լցրեք սառը զտված ջրի մեջ (1։10)։ 24 ժամ թրմեք, քամեք։ Խմեք 150-ական մլ` օրը 3-4 անգամ, ուտելուց առաջ։
Միզամուղ. Վարսակի 150 գ հատիկը լցրեք 1 լ զտված ջրի մեջ, եփեք, մինչև մնա հեղուկի կեսը։ Երբ եփուկը գոլանա` լուծեք 2 ճ/գ մեղր, 30 րոպե թրմեք, քամեք։ Խմեք 100-ական մլ` օրը 3-5 անգամ։
Քարեր երիկամներում. Վարսակի հատիկը եփեք ջրի մեջ (1։5), դրեք տաք թրջոցներ երիկամների հատվածում։ Տաքացնում է միզուղիները, ինչի շնորհիվ հեռացվող ավազը և մանր քարերը ցավ են պատճառում։
- Վարսակի 400 գ հատիկը լցրեք 3 լ զտված ջրի մեջ, 3 ժամ եփեք, 1 ժամ թրմեք, քամեք։ Հումքն աղացեք, լցրեք եփուկի մեջ, ավելացրեք 1 լ եռջուր։ Պահեք սառնարանում։
Չափաբաժինն օգտագործեք 2 օրվա ընթացքում, նախօրոք գոլացրեք։ Բուժումը շարունակեք 3 ամիս։ Բուժման նախնական շրջանում մեզի գույնը կփոխվի կարմիրի։ Ինչը չի կարող անհանգստության պատճառ լինել, որոշ ժամանակ անց գույնը կկարգավորվի։ Խստորեն հակացուցված են սուր համեմունքները և ալկոհոլը։ Եփուկը նաև մաքրում է աղեստամոքսային համակարգը և լեղապարկը։
Վարսակը` որպես նիհարեցնող միջոց
Վարսակով պատրաստված շիլան կանոնավորում է փոխանակման գործընթացները, ինչի շնորհիվ լավացնում է մարսողությունը, աղիների գործունեությունը և ենթաստամոքսային գեղձի աշխատանքը։ Բույսի մեջ պարունակվող բջջանքը մաքրում է աղեստամոքսային համակարգի բոլոր հատվածները և հեռացնում կուտակված վնասակար նյութերը։
Վարսակի կանոնավոր կիրառումը սննդակարգում նպաստում է նիհարելուն, թարմացնում և առողջացնում է մաշկը և մազերը։
- Վարսակի շիլան պետք է պատրաստել անմիջապես ուտելուց առաջ։
Կարելի է վարսակի փաթիլները 8-10 ժամ թրմել սառը ջրում և ուտել նախաճաշին` առանց եփելու, սև սալորի չրի հետ։
Շատ օգտակար է վարսակի եփուկը մեղրի և կիտրոնի հյութի հետ, որը կարելի է խմել երկար ժամանակ։
- Վարսակի 300 գ հատիկը 20 րոպե եփեք 300 մլ ջրի մեջ, 1 ժամ թրմեք, քամեք։ Խմեք օրվա ընթացքում։
Զգուշացում։ Յուրաքանչյուր օրգանիզմ ունի իր առանձնահատկությունները, հնարավոր է, որ վարսակի օգնությամբ բուժումն ունենա նաև վնասակար ազդեցություն։
Խորհրդակցեք բժշկի հետ։
Հ.Գ. Լույս են տեսել հեղինակի «Մոգական բուժարարներ» մատենաշարի թվով 4 գրքույկները: Հիշեցնենք, որ վաճառքում է նաև հեղինակի «Պահապան ծառերի բուժիչ զորությունը» գիրքը: Հեղինակի բոլոր գրքերը կարող եք ձեռք բերել «Նոյյան տապան», «Բուկինիստ», «Նոր գիրք» և «Արտ Բրիջ» (Աբովյան 20) գրախանութներից:
