Զեկույց. Հայաստանը 2012-13թթ. գնել է Տ-72 տանկեր ու ԲՏՌ-80 զրահափոխադրիչներ. Ռազմինֆո

2013 թվականին Ռուսաստանը Հայաստանի զինված ուժերին է մատակարարել 35 միավոր Տ-72 տանկ, որոնք մինչ այդ օգտագործվել են ռուսաստանյան զինված ուժերում։ Ս.թ. հունիսին Ռազմինֆոն արդեն հայտնել էր այս մասին՝ հիմնվելով ՄԱԿ-ի սովորական սպառազինությունների ռեգիստրի տվյալների վրա, սակայն առանց մանրամասների: Այժմ այս տեղեկությունը՝ լրացուցիչ մանրամասներով, հաստատվել է ռուսաստանյան «Զենքի համաշխարհային առևտրի վերլուծության կենտրոնի» հրապարակած զեկույցում:

Կազմակերպության զեկույցի համաձայն՝ տանկերի մատակարարման վերաբերյալ Հայաստանն ու Ռուսաստանը պայմանավորվել են 2012 թվականին, իսկ մատակարարումն իրականացվել է 2013թ.: Կենտրոնի գնահատմամբ՝ հայկական կողմը գնել է տանկերը մոտավորապես 50 մլն ԱՄՆ դոլարով (1,4 մլն դոլար մեկ միավորի համար):

Զեկույցի տվյալներով՝ նույն 2012թ. Հայաստանը Ռուսաստանից գնել է նաև 110 միավոր ԲՏՌ-80 զրահափոխադրիչ, որոնք նույնպես մինչ այդ կիրառվել էին ռուսաստանյան զինված ուժերում: Այս մասին նույնպես մինչ այս հայտնի էր ՄԱԿ-ի սովորական սպառազինությունների զեկույցից, բայց առանց մանրամասների:

Զրահափոխարդիչների մատակարարումը նույնպես կատարվել է 2013թ., իսկ դրանց համար հայկական կողմը, աղբյուրի գնահատականներով, վճարել է մոտ 30 մլն դոլար (մոտ 270 հազար դոլար մեկ միավորի համար):

Ավելացնենք, որ հայկական զինված ուժերի տանկային սպառազինության հիմնական մասը հենց Տ-72 տանկերն են: Ռազմինֆոյի գնահատականով հայկական զինված ուժերում (ներառյալ Պաշտպանության բանակը) մինչ այդ կար այս տիպի 530-540 միավոր տանկ:

 Մանրամասներն՝ այստեղ