Դոնբասում նշանակված ընտրությունները հակասում են մինսկյան պայմանավորվածություններին. Օլանդ
Ուկրաինական UNIAN լրատվական գործակալության փոխանցմամբ՝ Ֆրանսիայի նախագահ Ֆրանսուա Օլանդը Ուկրաինայի նախագահ Պյոտր Պորոշենկոյի հետ հեռախոսազրույցի ժամանակ մտահոգություն է հայտնել մինսկյան պայմանավորվածությունների կատարման կապակցությամբ, ինչը հատկապես վերաբերվում է նոյեմբերի 2-ին Դոնբասում պլանավորված ընտրություններին:
Այս մասին հայտնել է Ուկրաինայի նախագահի մամլո ծառայությունը: Օլանդը համոզված է, որ այդ ընտրությունները հակասում են մինսկյան պայմանավորվածություններին, որոնք Միլանում անցկացված միջազգային բանակցությունների ժամանակ ճանաչվել են բոլորի կողմից՝ ներառյալ Ռուսաստանը:
Ֆրանսիայի նախագահն այդ համատեքստում առաջարկել է տվյալ խնդրի կարգավորումը շարունակել բազմակողմ, մասնավորապես Նորմանդական ձևաչափով: Պորոշենկոն իր հերթին Օլանդին կոչ է արել արագորեն վավերացնել ԵՄ-ի ու Ուկրաինայի միջև ստորագրված Ասոցացման համաձայնագիրը:
