ԱՊՀ-ի երկրները ստեղծել են սահմաններին առկա իրավիճակի մասին տեղեկատվության փոխանակման համակարգ
Ռուսական РИА Новости լրատվական գործակալության փոխանցմամբ՝ ԱՊՀ անդամ մի շարք երկրների սահմանապահ ծառայությունները ստեղծել են ԱՊՀ-ի արտաքին սահմաններում տիրող իրավիճակի մասին տեղեկատվության օպերատիվ փոխանակման համակարգ:
Այս մասին հայտարարել է ԱՊՀ Սահմանապահ զորքերի հրամանատարների խորհրդի կոորդինացիոն ծառայության նախագահ, գեներալ-գնդապետ Ալեքսանդր Մանիլովը. «Այսօր գործում է այդ համակարգը, այն հնարավորություն է տալիս իրական ժամանակի ռեժիմով գնահատել արտաքին սահմաններում տիրող իրավիճակը:
Դա ԱՊՀ երկրների սահմանապահ ծառայությունների միջև համագործակցության ամենաարդյունավետ ձևն է: Այդ համակարգում արդեն իսկ մտել են Հայաստանի, Ռուսաստանի, Ղազախստանի, Բելառուսի, Ղրղզստանի, Տաջիկստանի սահմանապահ ծառայությունները: Դիտարկվում է Ուզբեկստանի մասնակցության հարցը: Այդ համակարգի շրջանակներում համագործակցություն է իրականացվելու ՇՀԿ-ի հետ»:
