Lada Kalina-ն վտանգավոր է կատուների համար
АвтоВАЗ-ի ղեկավարությանը անսովոր խնդրանքով են դիմել Տոլյատտիի փրկարարները։ Նրանք խնդրել են փոխել Lada Kalina-ի կառուցվածքը՝ կատուների պատճառով։ Ինչպես գրում է «Российская Газета»-ն, փրկարարները նշել են, որ կատուները հաճախ թաքնվում են ավտոմեքենայի շարժիչային հատվածում և վնասվածքներ ստանում։
«Քաղպաշտպանության կենտրոն» որոնողա-փրկարարական կայանի ղեկավար Անդրեյ Դերբենևը պարբերականի հետ զրույցում ասել է, որ ի տարբերություն մյուս մեքենաների, Lada Kalina-ի շարժիչային հատվածն այնպես է նախագծված, որ այնտեղ կարելի է մտնել անիվների տակից։ Կատուները այնտեղ են սողոսկում տաքանալու համար և վնասվածքներ են ստանում, երբ գործի է գցվում շարժիչը։ Դերբենևը, սակայն, չի նշել, թե Kalina-ի որ սերնդի մեքենաները նկատի ունի։
Շատ հաճախ կատուները կապոտի տակ հայտնաբերվում են հենց շարժիչը գործի գցելուց հետո, և վնասված կենդանուն փրկելու համար հարկ է լինում քանդել մեքենայի մասերը։
Դերբենևը ասել է, որ ավտոարտադրողի հետ արդեն խորհրդակցել են այդ հարցով, սակայն արդյունքների մասին դեռևս չի հաղորդվում։
