Փհենյանն առաջարկել է համադաշնության մեջ միավորել երկու Կորեաները
Ռուսական ИТАР-ТАСС լրատվական գործակալության փոխանցմամբ` ԿԺԴՀ-ի արտգործնախարար Լի Սու Ենը ՄԱԿ ԳԱ-ի 69-րդ նստաշրջանի ժամանակ առաջարկել է համադաշնության մեջ միավորել երկու Կորեաները.
«ԿԺԴՀ-ը պնդում է, որ վերամիավորումը պետք է իրականացվի ոչ թե (քաղաքական) համակարգերի հակամարտության միջոցով, այլ` համադաշնության բանաձևով, որը նախատեսում է երկրում երկու համակարգերի գոյակցություն: Դա միակ եղանակն է` կանխելու համար պատերազմն ու երաշխավորելու համար խաղաղություն»:
Լի Սու Ենը նաև քննադատել է ԱՄՆ-ին` ԿԺԴՀ-ի ինքնիշխանության ու գոյատևման իրավունքին սպառնալու ու «խեղդելու ռազմավարության» համար: Նրա կարծիքով` Կորեական թերակղզու միջուկային խնդիրը կկարգավորվի այն դեպքում, եթե Վաշինգտոնը փոխի Փհենյանի հանդեպ իր քաղաքականությունը:
