Մոլդովան պահանջում է Մերձդնեստրից շուտափույթ դուրս բերել ռուսական զորքերը
Ռուսական ИТАР-ТАСС լրատվական գործակալության փոխանցմամբ` պաշտոնական Քիշնևը պահանջում է շուտափույթ Մերձդնեստրից դուրս բերել ռուսական զորքերն ու այնտեղ ծավալել միջազգային քաղաքացիական առաքելություն: Այս մասին ՄԱԿ ԳԱ-ի ամբիոնից հայտարարել է Մոլդովայի արտգործնախարար Նատալիա Գերմանը:
Նա հույս է հայտնել, որ Ռուսաստանը չի ձգձգի Մերձդնեստրից իր զորքերի դուրս բերման հարցը: Գերմանն ընդգծել է, որ Մերձդնեստրում միջազգային քաղաքացիական առաքելություն ծավալելը դրական լիցք կհաղորդի քաղաքական գործընթացին: Նրա կարծիքով` ռուս զինծառայողների դուրս բերումը դրականորեն կազդի Քիշնևի ու Տիրասպոլի միջև բանակցությունների վրա:
Գերմանը հիշեցրել է, որ Քիշնևի վերջնական նպատակը նախկինի նման մեկն է` հասնել հարցի քաղաքական կարգավորմանը, որը հենված կլինի Մոլդովայի Հանրապետության ինքնիշխանության ու տարածքային ամբողջականության և Մերձդնեստրին հատուկ կարգավիճակ շնորհելու վրա:
