ԱՄՆ-ն Հայաստանին առաջարկել է ճանաչել Կոսովոն. «ՀԺ»
«Հայկական Ժամանակ» թերթը գրում է. «Լավատեղյակ աղբյուրներից հայտնի դարձավ, որ ԱՄՆ-Հայաստան հարաբերությունների օրակարգում մի նոր՝ անսպասելի հարց է հայտնվել. ըստ այդմ՝ ԱՄՆ-ն փորձում է Հայաստանին համոզել, որ վերջինս ճանաչի Կոսովոյի անկախությունը:
Եթե նման բան տեղի ունենա, ՀՀ-ն կդառնա առաջին ոչ մերձբալթյան խորհրդային պետությունը, որ ճանաչում է Կոսովոյի անկախությունը:
Մեր տեղեկություններով, Հայաստանը հետաքրքրվել է այս թեմայով. ՀՀ դիվանագետներն ամերիկացիներին ասել են, որ եթե Կոսովոն ճանաչի Ղարաբաղի անկախությունը, ՀՀ-ն էլ կճանաչի Կոսովոն:
Վերջինիս կողմից Ղարաբաղի անկախությունը ճանաչելը չափազանց անհավանական է թվում, որովհետև Կոսովոն մահմեդական երկիր է: Այսուհանդերձ, դիտորդները նկատում են, որ այս երկրի վրա չափազանց մեծ է ԱՄՆ-ի ազդեցությունը, որն էլ դե ֆակտո նրա անկախության կնքահայրն է:
Այս թեման զգայուն է նաև հայ-ռուսական հարաբերությունների տեսանկյունից։ ՌԴ-ն Կոսովոյի անկախությունը չի ճանաչել, բայց ժամանակին փորձել է Հայաստանին համոզել, որ վերջինս ճանաչի Աբխազիայի և Հրվ. Օսիայի անկախությունը։ ՀՀ-ն, սակայն, մերժելու անխոցելի փաստարկ է ունեցել: Դա կնշանակի փչացնել հարաբերությունները Վրաստանի հետ, որը, ըստ էության, կյանքի ճանապարհ է Հայաստանի համար։
Թերթը հավելում է նաև, որ սեպտեմբերի 23-ին Նյու Յորքում Հայաստանի արտգործնախարար Էդվարդ Նալբանդյանը մի շարք հանդիպումներ է ունեցել տարբեր երկրների արտգործնախարարների հետ ինչպես նաև հանդիպել է Կոսովոյի նախագահ Աթիֆեթե Յահյագայի հետ։ Նախարարը նշել է, որ թեև Հայաստանը չի ճանաչել Կոսովոն, սակայն նման կարգի հանդիպումները օգտակար են մտքերի փոխանակման համար»։
Մանրամասները՝ «Հայկական Ժամանակի» այսօրվա համարում։
