Իտալիան թույլատրել է իր տարածքում TAP գազատարի կառուցման աշխատանքներ սկսելը
Ադրբեջանական APA լրատվական գործակալության փոխանցմամբ` Իտալիայի կառավարությունը ձեռնարկել է ևս մեկ քայլ «Անդրադրիատիկ» գազատարի (Trans Adriatic Pipeline, TAP) նախագծի իրագործման ուղղությամբ: Ստորագրվել է գազատարի իտալական հատվածի` բնապահպանական համապատասխանության մասին հրամանը:
TAP կոնսորցիումի ներկայացրած փաստաթուղթը ստորագրել է Իտալիայի բնապահպանության նախարար Ջանլուկա Գալետին: Փաստաթուղթը հավանության է արժանացել տեղական համայնքների հետ բազմակողմ փոխգործակցության ու կանոնավոր քննարկումների, հասարակության հետ, գործընթացում ներգրավված ազգային ու տարածքային իշխանական մարմինների խորհրդակցությունների արդյունքում:
Հաղորդագրության մեջ նշված է, որ TAP-ը ձգտում է դառնալ համաշխարհային մակարդակի նախագիծ և կշարունակի սերտ համագործակցությունը բոլոր կողմերի հետ: Ադրբեջանը պաշտոնապես TAP նախագիծը հայտարարել է դեպի Եվրոպա իր գազի արտահանման երթուղի:
