Ռուսական հումանիտար օգնության բոլոր բեռնատարները ժամանել են Լուգանսկ
Ռուսական РИА Новости լրատվական գործակալության փոխանցմամբ` Ուկրաինայի հարավ-արևելքի համար նախատեսված ռուսական հումանիտար օգնության բոլոր բեռնատարները ժամանել են Լուգանսկ: Ավտոշարասյան ճանապարհին խնդիրներ չեն ծագել:
Ներկա դրությամբ ընթանում է այդ հումանիտար օգնության բեռան դատարկումը: Դա իրականացվում է երեք բազայում, որոնցից երկուսը սննդամթերքի բազաներ են, իսկ մեկը` դեղորայքի: Ակնկալվում է, որ տվյալ գործընթացը կավարտվի այսօր երեկոյան:
Ռուսական բեռնատարներն Ուկրաինայի տարածքը կլքեն վաղը: Ընդհանուր առմամբ, հումանիտար ավտոշարասյան մեջ ընդգրկվել է մոտ 200 մեքենա, որոնք ընդհանուր առմամբ տեղափոխել են 2000 տոննա բեռ` սննդամթերք, դեղորայք, տաք իրեր:
Կարմիր խաչի ներկայացուցիչները չեն ուղեկցել ավտոշարասյանը, քանի որ նրան պաշտոնապես չեն իրազեկել Մոսկվայի ու Կիևի միջև ձեռք բերված համապատասխան համաձայնագրի մասին:
