Թուրքիան Ֆրանսիային է հանձնել իսլամականների համար զինյալներ հավաքագրողին
Թուրքական Hürriyet թերթի փոխանցմամբ՝ Թուրքիայի իշխանությունները Ֆրանսիային են հանձնել ահաբեկչական մասնաճյուղի ղեկավարին, ով Ֆրանսիայում հավաքագրում էր մուսուլմաններին, իսկ հետո՝ ուղարկում Սիրիա:
Խոսքը գնում է Մարոկկոյում ծնված Մուրադ Ֆարեսի մասին, որին Ֆրանսիայում հարցաքննելուց հետո որոշել են կալանավորել: Նրան մեղադրել են ահաբեկչական խմբավորման հետ կապված լինելով ահաբեկչական գործողությունների մասնակցելու և ահաբեկչական կազմակերպություն գլխավորելու մեջ:
Այս մասին երեկ հայտնել է Ֆրանսիայի ՆԳՆ-ը: Ֆրանսիայի ներքին գործերի նախարար Բեռնար Կազնևը հայտարարել է, որ Ֆարեսն առանցքային դեր է խաղացել Թուլուզում ու Ստրասբուրգում երիտասարդ ֆրանսիացիներին հավաքագրելու ու հետագայում Սիրիա ուղարկելու հարցերում: Ֆարեսը Թուրքիայում կալանավորվել է մեկ ամիս առաջ:
Հատուկ ծառայությունների տվյալներով՝ Ֆրանսիայի մոտ 900 քաղաքացի արդեն իսկ պատերազմում են կամ էլ ռազմական ուսուցում են ստանում՝ Մերձավոր Արևելքում իսլամականների կողմից պատերազմելու համար: Նրանք գլխավորապես ուղարկվել են Սիրիա և Իրաք, ինչպես նաև Հյուսիսային Աֆրիկա:
