Ադրբեջանի ՊՆ-ը հավատարմագրման համակարգ է մտցնում ռազմական թեմաները լուսաբանող լրագրողների համար
Ադրբեջանական Turan լրատվական գործակալության փոխանցմամբ՝ Ադրբեջանի ՊՆ-ի մամլո ծառայությունը պլանավորում է հավատարմագրման համակարգ մտցնել ռազմական թեմաները լուսաբանող լրագրողների համար: Այս մասին Turan գործակալությանը հայտնել է ՊՆ-ի մամլո ծառայության ղեկավար Վագիֆ Դարգյահլին:
Բացի այդ, կազմակերպվելու են սեմինարներ, «կլոր սեղաններ» և լրագրողների այցեր դեպի զորամասեր: Դարգյահլին ընդունել է, որ նման միջոցներն ընդունվել են օգոստոսի 29-ին անցկացված քննարկումներից հետո, որոնք առնչվել են մի շարք ԶԼՄ-ների ու ինտերնետային ռեսուրսների կողմից ռազմական գաղտնիքի խախտմանը:
