ԼՂ-ի հարցը կընդգրկվի ՆԱՏՕ-ի գագաթաժողովի օրակարգում. Էրդողան
Ադրբեջանական Trend լրատվական գործակալության փոխանցմամբ՝ Լեռնային Ղարաբաղի հարցն ընդգրկվելու է ՆԱՏՕ-ի գագաթաժողովի օրակարգում: Այս մասին այսօր Բաքվում Իլհամ Ալիևի հետ համատեղ մամուլի ասուլիսի ժամանակ հայտարարել է Թուրքիայի նախագահ Ռեջեփ Էրդողանը:
Նրա խոսքերով՝ Թուրքիան պլանավորել է սեպտեմբերի 4-5-ին Ուելսում կայանալիք ՆԱՏՕ-ի գագաթաժողովի ժամանակ հիշեցնել Ադրբեջանին դաշինքի տված խոստումների կատարման կարևորության մասին.
«Դա Ադրբեջանի իրավունքն է, և երկրին տրված խոստումները պետք է կատարվեն: Թուրքիան պատրաստ է վճռականություն ցուցաբերել տվյալ հարցում»: Էրդողանի խոսքերով՝ Ղարաբաղյան հակամարտության կարգավորումն առաջնահերթ է Թուրքիայի համար:
Էրդողանը հայ-թուրքական հարաբերությունների կարգավորումը շաղկապել է Ղարաբաղյան հակամարտության կարգավորման հետ՝ հիշեցնելով, որ Անկարան քանիցս հայտարարել է այդ մասին:
