Ադրբեջանցի զինծառայողները կմասնակցեն Ուկրաինայի արևմուտքում ՆԱՏՕ-ի առաջիկա վարժանքներին
Haqqin.az պորտալի փոխանցմամբ՝ պլանավորված է, որ ադրբեջանցի զինծառայողները կմասնակցեն Ուկրաինայի արևմուտքում կայանալիք Rapid Trident զորավարժություններին: Այս մասին հայտարարել է Ադրբեջանի ՊՆ-ի մամլո ծառայությունը:
Վերջինս խոստացել է առաջիկա օրերին հրապարակել առավել կոնկրետ տեղեկատվություն այդ վարժանքներին ադրբեջանական ստորաբաժանման մասնակցության մասին: Rapid Trident զորավարժություններին մասնակցելու է ԱՄՆ-ի ու նրա դաշնակիցների ավելի քան 1000 զինծառայող:
Ամենամյա այդ զորավարժությունները պետք է անցկացվեին հուլիսին, սակայն դրանք հետաձգվեցին Ուկրաինայի արևելքում տիրող իրավիճակի պատճառով: Զորավարժություններ անցկացնելու մասին որոշումը վկայում է, որ ՆԱՏՕ-ի երկրները մտադիր են աջակցել Ուկրաինային՝ առանց ուղիղ կերպ հակամարտությանը միջամտելու:
Զորավարժություններն անցկացվելու են սեպտեմբերի 16-26-ին, Լվովի մարզի Յավորով քաղաքի ուսումնական կենտրոնում՝ Լեհաստանի սահմանից ոչ հեռու:
