Գերմանիան ու Ավստրալիան զենք կմատակարարեն Հյուսիսային Իրաքի քրդերին
Թուրքական Anadolu լրատվական գործակալության փոխանցմամբ՝ Ավստրալիան զենք ու զինամթերք է հատկացնելու Հյուսիսային Իրաքի քրդերին (Փեշմերգա)՝ «Իսլամական պետություն» խմբավորման դեմ պայքար մղելու համար: Այս մասին հայտարարել է Ավստրալիայի վարչապետ Թոնի Էբոտը:
Դրա հետ մեկտեղ նա ընդգծել է, որ իրենք զինծառայողներ չեն ուղարկի Հյուսիսային Իրաք՝ ընդգծելով, որ տվյալ հարցում իրենք համակարծիք են ԱՄՆ նախագահ Բարաք Օբամայի հետ, որ կարիք չկա ցամաքային ռազմական գործողություն ձեռնարկելու Իրաքում:
Գերմանիայի կանցլեր Անգելա Մերկելն իր հերթին կառավարության նիստում հայտարարել է, որ իրենք որոշել են զենք մատակարարել Փեշմերգային՝ «Իսլամական պետություն» խմբավորման դեմ պայքարի համար: Դա կբավականացնի Փեշմերգայի 4000 զինծառայողի սպառազինելու համար:
Գերմանիան, մասնավորապես, Փեշմերգային կհատկացնի 530 հակատանկային հրթիռ, հաստոցավոր գնդացիրներ, 10.000 ձեռքի նռնակ, 8000 ինքնաձիգ:
