Համատարած որակյալ կրթությունը պետական անվտանգության երաշխիքներից է
«Որևէ մեկը չի կարող վիճարկել այն փաստը, որ երկրիս անվտանգությունն ուղիղ
համեմատականորեն կախված է կրթության այն որակից ու մակարդակից, որն
հավասարապես իրականացվում է պետության ամբողջ տարածքում: ԿԳ
նախարարության Հանրակրթության վարչության պետը 2 օր առաջ հայտարարեց, որ.
«Կոնկրետ խնդիրներ չկան, շատ կարևոր հարցեր լուծված են սեպտեմբերի մեկի
համար, դրանք երեխաներին դասագրքերով ապահովելն է, հնարավորինս բարեկարգ
շենքերում նրանց ընդունումն է, չնայած դեռ ունենք դպրոցներ, որոնք պետք է
կարգավորվեն, բոլոր դեպքերում դպրոցների համար լուծված է ջեռուցման հարցը»:
Հատուկ տիկին Հովհաննիսյանի համար, եթե մտահոգ է, կարող եմ տրամադրել
հանրապետությունում ջեռուցման խնդիր, անբարեկարգ և շատ հին գույք ունեցող
դպրոցների ցանկը:
Հանրապետության գործող նախագահը վերջերս իրենց բազեականների հետ
հանդիպման ժամանակ հատուկ ընդգծեց մեր աշակերտների միջազգային
օլիմպիադաներում ունեցած թվային հաջողությունները՝ դրանք համեմատելով
հարևանների ձեռքբերումների հետ, որն իհարկե ի օգուտ Հայաստանի է:
Միջազգային օլինպիադաներում մեդալներ շահած աշակերտները հանրապետության
3-4 դպրոցների ներկայացուցիչներ են: Պատկերացնու՞մ եք այս թիվը որքան ավելի
մեծ կլիներ, եթե բոլոր դպրոցները լինեին բարեկարգ, նրանց մեծ մասն
ապահովվեին որակյալ տնօրեններով ու ուսուցիչներով, գույքը լիներ
համապատասխան, մեծամասնությունն ունենային կահավորված լաբորատորիաներ:
«Հանրակրթության մասին» ՀՀ օրենքով կրթության նպատակներից է հայրենասեր
քաղաքացի դաստիարակելը:
Հայրենասիրական դաստիարակության օրինակ պետք է առաջինը տա
իշխանությունը, որը պետության ողջ տարածքում գտնվող բոլոր դպրոցների
կարիքների նկատմամբ լինի հոգատար, իսկ սահմանամերձ գյուղերի նկատմամբ
հայրենասեր կառավարությունը պետք է դրսևորեր արտոնյալ վերաբերմունք: Այս
գյուղերի դպրոցներում առնվազն պետք է կրկնապատկել աշակերտ թվով
ֆինանսավորման չափը, որպեսզի այնտեղ ուսուցիչն ավելին ստանա և մնա՛
գյուղում, այս գյուղերում դպրոցների շենքերն առանց բացառության պետք է
լինեն բարեկարգ, ջեռուցվող, գույքը թարմ, հագեցած լաբորատորիաներով ու
կայացած ուսուցիչներով, որպեսզի երեխաները ուզենան մնալ իրե՛նց գյուղի
դպրոցում : Սա կլինի հայրենասիրական օրինակելի վերաբերմունք կառավարության
կողմից, որի արդյունքում իսկապես կունենանք համատարած հայրենասեր
քաղաքացիներ: Իսկ սահմանամերձ գյուղերի դպրոցներում իրականությունը շատ
հեռու է նկարագրածից, հետևաբար վտանգված է պետության անվտանգությունը»:
Անահիտ Բախշյան
Երևանի ավագանու կրթության հանձնաժողովի անդամ
