Մարտիրոս Ժամկոչյան. «Ադրբեջանցի զինվորները գիտեն, որ սա իրենց հողը չէ, դրա պատճառով են պարտվում»
«Ես գիտեմ, որ պատերազմ չի լինելու: Ադրբեջանցին այսօր դա անում է ներքին քաղաքականության համար, որպեսզի ցույց տա, որ ինքը հզոր է»,- այսօր լրագրողների հետ հանդիպման ժամանակ ասաց Մոնթեի մարտական ընկեր, Արցախյան պատերազմի մասնակից, Հայաստանի Ազատագրության Հայ Գաղտնի Բանակի (ԱՍԱԼԱ) մարտիկ Մարտիրոս Ժամկոչյանը:
Նրա խոսքով՝ ադրբեջանցի զինվորների թերությունը իրենց հոգեբանության մեջ է: «Ադրբեջանը փող ունի և իր փողը շռայլ օգտագործում է: Ես չեմ ասի, թե դա մեզ վախեցնելու է: Այդ զենքն ու զինամթերքը, որ Ադրբեջանը վերցնում է, կարող է աշխարհի լավագույն զենքերը ունենա, բայց մարտունակ բանակ չի ունենա: Ադրբեջանը մարտունակ ստորաբաժանումներ չունի: Ադրբեջանցիների զինվորների հոգեբանության մեջ մի բան կա. իրենք գիտեն, որ սա իրենց հողը չէ, դրա պատճառով են պարտվում: Իսկ մենք գիտենք»,- ասաց Մ. Ժամկոչյանը:
Ազատամարտիկը ասում է՝ 20 տարի առաջ թուրքական դիվանագիտական կորպուսը փակվեց՝ շնորհիվ իրենց: Ադրբեջանցիները ԱՍԱԼԱ-ի մասին լսելիս դողում էին: Մարդիկ վախենում էին դիվանագետ դառնալ, որ հանկարծ օրերից մի օր ԱՍԱԼԱ-ն իրենց չոչնչացնի.
«Ադրբեջանական լրատվամիջոցների 25-30 տոկոսը ամեն երեկոյան ԱՍԱԼԱ-ի մասին է խոսում: Երբ մենք ժամանակին հակահարված տվեցինք իրենց, քմահաճույքի համար չէր դա: Համայն աշխարհին լսեցնելու համար էր, որ ունենք հայակական հարց, ունենք հայկական հողեր և պահանջատիրական ենք մենք»:
Լրագրողներից մեկի հարցին, թե որքանո՞վ է իրենց ընտանիքը գնահատված զգում հայրենիքի կողմից, ՀՀ ազգային հերոս Թաթուլ Կրպեյանի դուստրը՝ Ասպրամ Կրպեյանը պատասխանեց.
«Գնահատված եմ այնքանով, որ Հայաստանի ազգային հերոս Թաթուլ Կրպեյանի դուստրն եմ: Ինձ դրանից առավել և հայրիկիս գործից առավել որևէ գնահատական չի կարող լինել, որովհետև այն, ինչ արել է հայրս և այն, ինչ արել են իր ընկերները, արել են առանց որևէ ակնկալիքի, որ երբևէ որևէ մեկը որևէ գնահատական պիտի տա: Դա նրանց համոզմունքն է եղել, նրանց ապրելակերպը, և այն թանկարժեքը, ինչին որ հավատացել են. իսկ դա անգնահատելի է»:
