Սեփական ուժի մասին ադրբեջանական առասպելն առաջին իսկ անհաջողության դեպքում սկսում է աշխատել հակառակ արդյունավետությամբ. Վարդան Ոսկանյան
Արևելագետ Վարդան Ոսկանյանը ֆեյսբուքյան էջում որոշ նկատառումներ է ներկայացրել` հայ-ադրբեջանական սահմանին եւ շփման գծում վերջին օրերի լարվածության հետ կապված.
«Հայկական և ադրբեջանական կողմերի ռազմական ակտիվության հետ կապված վերջին օրերի իրադարձություններն ընդհանուր առմամբ ևս մեկ անգամ ապացուցեցին այն հաշվարկներն, ըստ որոնց՝ հնարավոր պատերազմի դեպքում Ադրբեջանում նկատելի խուճապային տրամադրություններ սերմանելը և ալիևյան վարչակարգի կողմից խստագույն վերհսկողության տակ գտնվող թվացյալ կուռ և կենտրոնացված քարոզչական ողջ համակարգը լրջորեն խաթարելը կամ կաթվածահար անելը բարեբախտաբար անհնարինի ոլորտից չէ:
Այս համատեքստում թերևս ամենակարևոր նկատառումն այն է, որ ադրբեջանական քարոզչամեքենայի կողմից սեփական երկրի ուժի ու հզորության մասին տարիներ շարունակ մեթոդաբար ներդրված առասպելն առաջին իսկ շոշափելի ռազմական անհաջողության դեպքում սկսում է աշխատել ուղիղ հակառակ արդյունավետությամբ՝ նպաստելով համատարած խուճապի և հուսալքության արմատավորմանը զանազան ասպարեզներում»:
