Ֆիլմ-ճամբարում երիտասարդներն են կինոարտադրող (լուսանկարներ)
Գյումրիի Թռչունյան տունը, արդեն յոթերորդ օրն է՝ հյուրընկալել է Ազգային առաջնորդության ինստիտուտի և ամերիկյան Inside Out Global-ի համատեղ ֆիլմ-ճամբար ծրագրի հեղինակներին և մասնակիցներին:
Այս օրերի ընթացքում 17-20 տարեկան թվով 13 երիտասարդ սովորում է կինոարտադրության ոլորտում գործունեություն ծավալելու որոշակի հմտություններ:
Ընտրվել են մասնակիցներ Երևանից, Գյումրիից, Վանաձորից, ինչպես նաև տարբեր մարզերից, ովքեր այս օրերի ընթացքում հասցրել են մտերմանալ, սովորել և աշխատել միասին:
Երիտասարդ մասնակիցներին կազմակերպիչները բաժանել են 2 թիմերի, որոնց հետ օրերն անցնում են չափազանց հագեցած գրաֆիկով` անընդհատ դասեր և պրակտիկա: Երիտասարդներն արդեն սկսել են իրենց կարճամետրաժ ֆիլմերի նկարահանումները:
Ճամբարում դասավանդող մասնագետները, որոնց մի մասը Հայաստանի ներկայացուցիչներն են, իսկ մի մասը ժամանել են արտերկրից, պնդում են, որ երիտասարդների մեջ հզոր պոտենցիալ կա. ճիշտ է, ուղղորդում են թիմի ավագները, սակայն ամբողջ նկարահանման պրոցեսը՝ սկսած նախնական փուլից, ձեռնարկում և իրականացնում են երիտասարդ ճամբարականները:
Նրանց է վստահված ամբողջ տեխնիկան, գաղափարը և ֆիլմարտադրողի պատասխանատու գործունեությունը: Ծրագրի հեղինակները մասնակիցների առօրյան դարձնում են հաճելի ու օգտավետ:
Ճամբարից դուրս ևս նրանց սպասվում են անակնկալներ` ճամբարականները գալիք «Ոսկե Ծիրան» փառատոնին հնարավորություն կունենան ներկա գտնվելու կազմակերպվելիք վարպետաց բոլոր դասերին, ինչպես նաև «Հայկական պանորամա»-ի ֆիլմերի անվճար դիտումներին:
Ֆիլմ-ճամբար ծրագրի կազմակերպիչների մյուս անակնկալն առավել գրավիչ է. երիտասարդ կինոարտադրողներն 8 օրվա ընթացքում իրենց նկարահանած կարճամետրաժ ֆիլմերը հնարավորություն ունեն հանդիսատեսին ներկայացնել Գյումրիի «Հոկտեմբեր» կինոթատրոնում: Ճամբարի ավարտին Ազգային առաջնորդության ինստիտուտը և Inside Out Global-ը բոլոր մասնակիցներին կհանձնեն հավաստագրեր:
Կինոարտադրողները հուլիսի 10-ին, ժամը 15:00-ին Գյումրիի «Հոկտեմբեր» կինոթատրոնում բոլորին հրավիրում են միաժամանակ 2 կարճամետրաժ ֆիլմերի պրեմիերային:
