Ֆրանսահայ մեծահարուստ գործարարն ամուսնացել է հանրահայտ մոդելի հետ. azatutyun.am
Ֆրանսահայ մեծահարուստ գործարար Արամ Օհանյանն ամուսնացել է ֆրանսիացի հանրահայտ թոփ մոդել Ադրիանա Կարեմբոյի հետ, հողորդում է azatutyun.am-ը։
Օհանյանը ծնվել է Երևանում, հետո տեղափոխվել Մարսել, որից հետո էլ՝ Մարաքեշ (Մարոկո)։ Նրան է պատկանում բազմաթիվ հայտնի և ազդեցիկ մարդկանց կողմից գնահատված Մարաքեշի «Ջադ – Մահալ» ռեստորան – դղյակն ու քաղաքի գիշերային ակումբներից մեկը։
Ըստ ֆրանսիական «Գալա» պարբերականի՝ Արամ կամ Անդրե Օհանյանի և հեռուստատեսային շոուներում հանդես եկող և մարդասիրական ձեռնարկներին իր մասնակցությունը բերող գեղեցկուհու քաղաքացիական ամուսնությունը կատարվել է Մոնակոյում, թեև ըստ այլ աղբյուրի, սիրահարները նախ գաղտնի ամուսնացել են Փարիզում, հետո մեկնել Մարաքեշ՝ հրավիրված 120 մերձավորների ու բարեկամների հետ տոնելու իրադարձությունը։
«Գալայի» փոխանցմամբ՝ նորապսակներին հեռախոսազանգով շնորհավորել է Շարլ Ազնավուրը։ Վերջինս Արամին ասել է.- «Մենք ունենք առնվազն երկու ընդհանրություն՝ երկուսս էլ հայ ենք, և երկուսս էլ ամուսնացած ենք բարձրահասակ և շիկահեր կանանց հետ»։
Պարբերականի փոխանցմամբ՝ Արամի ու Ադրիանայի արևելյան ոգով ներշնչված հարսանիքը եղել է շատ ջերմ և շատ շքեղ՝ զարդարված սպիտակ ծաղիկների հսկա փնջերով ու ջահերով, ծառերի մեջ՝ բյուրեղապակիներով, որոնք ստեղծել են, ինչպես ասել է ինքը՝ Ադրիանան «Հազար ու մի գիշեր» պատմությունների մթնոլորտ։ Հենց այդ մթնոլորտում է, որ մոր հետ թևանցուկ, ընդունելության սրահ է մուտք գործել Ադրիանան։
Սա Ադրիանայի երկրորդ ամուսնությունն է։ Նա ծագումով սլովակ է և ֆրանսիա է եկել 1994 թվականին, ամուսնացել՝ աշխարհի 1998 թվականի ֆուտբոլի առաջնությունը նվաճած խմբի անդամներից Քրիստիան Կարամբոյի հետ, իսկ 2011 թվականին պաշտոնապես բաժանվել է նրանից։
Ամբողջությամբ կարող եք կարդալ սկզբնաղբյուր կայքում:
