Ֆրանսուա Օլանդը կայցելի Վրաստան
Грузия Online-ի փոխանցմամբ՝ Վրաստանի ու Ֆրանսիայի նախագահներ Գեորգի Մարգվելաշվիլին ու Ֆրանսուա Օլանդը հանդիպել են Վիլնյուսում տեղի ունեցած «Արևելյան գործընկերության» գագաթաժողովի շրջանակներում: Հանդիպման ժամանակ կողմերը քննարկել են երկկողմ և բազմակողմ հարաբերություններին առնչվող հարցեր:
Մարգվելաշվիլին շնորհակալություն է հայտնել Օլանդին՝ Վրաստանի տարածքային ամբողջականությանը և եվրաինտեգրմանն աջակցելու համար: Ընդգծվել է Ֆրանսիայի այն դերը, որը նա խաղացել է Վրաստանի դեմ Ռուսաստանի ռազմական ագրեսիայի ժամանակ:
Մարգվելաշվիլին Օլանդին հրավիրել է Վրաստան, ինչն ընդունվել է: Նշվում է, որ Մարգվելաշվիլին Վիլնյուսում անցկացրել է նաև երկկողմ մի շարք այլ հանդիպումներ: Վիլնյուսը Մարգվելաշվիլիի համար դարձավ նախագահի պաշտոնը ստանձնելուց հետո առաջին արտասահմանյան այցը:
