Սիրիական ընդդիմությունն ԱՊԼ-ից պահանջել է Սիրիայի մշտական տեղը տրամադրել իրեն
Al-Quds Al-Arabi ինտերնետային պորտալի փոխանցմամբ՝ Սիրիայի ընդդիմադիր ու հեղափոխական ուժերի Ազգային դաշինքի առաջնորդ Ահմադ Ջարբան երեկ Կահիրեում հանդիպել է Արաբական պետությունների լիգայի (ԱՊԼ) գլխավոր քարտուղար Նաբիլ ալ-Արաբիի հետ:
Հանդիպման ժամանակ Ջարբան բարձրացրել է ԱՊԼ-ում Սիրիայի մշտական տեղը Ազգային դաշինքին տրամադրելու հարցը: Ջարբայի խոսքերով՝ Նաբիլ ալ-Արաբին տվյալ հարցում նախապայման է ներկայացրել՝ ձևավորել ընդդիմադիր ժամանակավոր կառավարություն:
Ջարբան հավելել է, որ այդ պայմանը կատարված է, նոյեմբերի 13-ին Ստամբուլում տեղի ունեցած Ազգային դաշինքի խորհրդաժողովում հայտարարվել է ժամանակավոր կառավարության ստեղծման մասին, որը բաղկացած է 9 նախարարից, և որին գլխավորում է Ահմեդ Տոումեն:
ԱՊԼ-ի գլխավոր քարտուղարի հետ հանդիպման ժամանակ Ջարբան վերստին հաստատել է, որ «Ժնև 2»-ին կոնֆերանսին մասնակցելու Ազգային դաշինքի պայմանը շարունակում է մնալ անցումային շրջանում Սիրիայի նախագահի պաշտոնից Բաշար Ասադի հեռացումը:
«Ժնև 2» կոնֆերանսը տեղի է ունենալու 2014 թվականի հունվարի 22-ին: ԱՊԼ-ը Սիրիայի անդամակցությունը կասեցրել է 2011 թվականին՝ կապված Սիրիական հակամարտության սկսվելու և իր անդամների կողմից Սիրիայի ղեկավարությանը հասցեագրած քննադատությունների հետ:
