ՀՀ-ում Հնդկաստանի արտակարգ և լիազոր դեսպանը ՀՀ ոստիկանությունում անդրադարձել է Դենիշ Բաբու Շահաբ Սինգխի դեպքին (տեսանյութ)
Նոյեմբերի 20-ին ոստիկանության պետի տեղակալ, քննչական գլխավոր վարչության պետ, ոստիկանության գեներալ-մայոր Գագիկ Համբարձումյանը եւ ոստիկանության շտաբի պետ, ոստիկանության գեներալ-մայոր Վարդան Եղիազարյանն ընդունեցին Հայաստանի Հանրապետությունում Հնդկաստանի արտակարգ եւ լիազոր դեսպան Սուրեշ Բաբուին։ ՀՀ ոստիկանության տարածած հաղորդագրության համաձայն՝ քննարկվել են Հայաստանի Հանրապետության ոստիկանության արդյունավետ ներգրավվածությունը հայ-հնդկական համագործակցության ծրագրերում, մասնավորապես՝ տեղեկատվական տեխնոլոգիաների բնագավառի, ինչպես նաեւ այլ ոլորտների մասնագետների մասնակցությունը վերապատրաստման դասընթացներին։
Հանդիպման ընթացքում դեսպանին պարզաբանումներ են տրվել նոյեմբերի 16-ին Հնդկաստանի Հանրապետության քաղաքացի Դենիշ Բաբու Շահաբ Սինգխի մասնակցությամբ տեղի ունեցած դեպքի կապակցությամբ հարուցված քրեական գործի ընթացքի վերաբերյալ։
Պայմանավորվածություն է ձեռք բերվել քրեական գործի ընթացքի մասին պարբերաբար տեղեկություններ տրամադրել հնդկական կողմին։
Սուրեշ Բաբուն շնորհակալություն է հայտնել ընդունելության համար։
Կողմերը վստահեցրել են, որ համագործակցությունը կկրի շարունակական բնույթ։
