Սուրիկ Խաչատրյանի ներկայացուցիչը չէր եկել դատարան
Սյունիքի նախկին մարզպետ Սուրիկ Խաչատրյանն ընդդեմ Գորիսի նախկին քաղաքապետ Սամվել Հարությունյանի դատական նիստը այսօր տեղի չունեցավ. նիստին չէր ներկայացել Խաչատրյանի ներկայացուցիչ Մարտին Զիլֆուղարյանը:
Հիշեցնենք, որ Սուրիկ Խաչատրյանը հայց է ներկայացրել Սամվել Հարությունյանի դեմ. նա պահանջում է հերքել իր պատիվ ու արժանապատվությունն արատավորող տեղեկությունները, որոնք մամուլի միջոցով հնչեցրել է Սամվել Հարությունյանը:
Մարտին Զիլֆուղարյանը նամակով դատարանին հայտնել էր, որ վատառողջ լինելու պատճառով չի կարողանա ներկայանալ դատական նիստին: Միևնույն ժամանակ նա խնդրել էր հետաձգել դատական նիստը՝ նշելով, որ ցանկանում է մասնակցել դրան և ցանկություն ունի փաստաթղթեր ներկայացնել: Դատարանը նպատակահարմար չհամարեց նիստն առանց հայցվորի ներկայացուցչի շարունակելը: Հաջորդ դատական նիստը տեղի կունենա դեկտեմբերի 12-ին:
