ԵԱՀԿ-ն խթանում է երիտասարդների և ոստիկանության համագործակցությունը Հայաստանում
Սոլակ գյուղի դպրոցականները ծանոթանում են ոստիկանության աշխատանքին ԵԱՀԿ աջակցությամբ կազմակերպված երկօրյա միջոցառման շրջանակներում, որը մեկնարկել է այսօր Կոտայքի մարզում:
Միջնակարգ դպրոցի երեսուն աշակերտներ հանդիպեցին տեղի ոստիկանների հետ՝ քննարկելու ոստիկանության աշխատանքի մարտահրավերները և մարզի անվտանգության իրավիճակը: Այս ծրագրում գործընկեր հանդիսացող «Իրավական հետազոտությունների ազգային կենտրոնի» փորձագետները դպրոցականներին կներկայացնեն թմրամոլության հետ կապված խնդիրները և կքննարկեն մարդկանց թրաֆիքինգի և կոռուպցիայի հետևանքները: Երեխաները նաև հնարավորություն կունենան տեսնելու այն սարքավորումները, որոնք ոստիկաններն օգտագործում են իրենց աշխատանքում և երթևեկել ոստիկանական ավտոմեքենայով:
«Իրավական հետազոտությունների ազգային կենտրոնի» նախագահ Տիգրան Երանոսյանը նշեց. «Դպրոցի անվտանգությանն ու ոստիկանություն–աշակերտ գործակցությանը հետամուտ նախաձեռնությունները նպաստում են համայնքային ոստիկանության ձևավորմանը Հայաստանի մարզերում: Այդ նախաձեռնությունները նպատակ ունեն բարձրացնելու հանրության վստահությունը ոստիկանության հանդեպ և խթանելու ոստիկանության և քաղաքացիական հասարակության համագործակցությունը հատկապես մարզերում»:
Վաղը նախաձեռնությանը կհաջորդի հանդիպում տեղի հումանիտար ինստիտուտի ուսանողների հետ, ովքեր կծանոթանան համայնքային ոստիկանության՝ որպես ոստիկանության նոր մոդելի հետ և կմասնակցեն քաղաքացիական խորհրդատվական խմբի դերախաղին:
2013թ. մարտ ամսից ի վեր գյուղական վայրերից շուրջ 270 դպրոցական հնարավորություն են ունեցել անմիջականորեն ծանոթանալու իրենց մարզային ոստիկանության բաժինների գործունեության հետ այս ծրագրի շրջանակներում: Ավելին՝ Հայաստանի յոթ մարզերից 140 ուսանող և 70 համայնքային ոստիկան նույնպես հնարավորություն ունեցան ձևավորելու ավելի լավ համագործակցային հարաբերություններ:
ԵԱՀԿ երևանյան գրասենյակ
