Ռուսաստանն արգելեց «Ռոշենի» ներմուծումը
ՌԴ Ռոսպոտրեբնադզորը արգելել է ուկրաինական Roshen ընկերության արտադրանքի ներմուծումը։ Ինչպես փոխանցում է ՌԻԱ Նովոստին, որոշման պատճառն այն է, որ ընկերության հրուշակային արտադրանքի որակի հետ կապված խախտումներ են հայտնաբերվել։ «Մաքսային մարմիններին հանձնարարվել է արգելել այդ արտադրողի արտադրանքի ներկրումը ՌԴ տարածք», — նշվում է հաղորդագրության մեջ։
Ավելի վաղ Ռոսպոտրեբնադզորը ստուգման էր ենթարկել ուկրաինական ընկերությանը պատկանող 4 գործարանների արտադրանքը։ Ընկերության արտադրանքը, մասնավորապես, չի համապատատասխանել ճարպերի պարունակության նորմատիվներին։ Իսկ Roshen-ի կաթնային շոկոլադի մեջ հայտնաբերվել է բենզոպիրեն, որը համարվում է առաջին կարգի վտանգավորության նյութ։
Նշենք, որ Roshen-ի արտադրանքը ներմուծվում է նաև Հայաստան և բավականին մեծ պահանջարկ է վայելում հայկական շուկայում։ ՀՀ սննդամթերքի անվտանգության պետական ծառայությունը, սակայն, որևէ խախտման մասին առայժմ չի հայտարարել։
