Մահմուդ Ահմադինեժադը զբաղվելու է գիտությամբ
Ամերիկյան Associated Press լրատվական գործակալության փոխանցմամբ՝ Իրանի նախագահ Մահմուդ Ահմադինեժադը ներկայիս պաշտոնին հրաժեշտ տալուց հետո զբաղվելու է գիտությամբ: Ակնկալվում է, որ նա կգլխավորի ներկայումս ստեղծվող Թեհրանի Տեխնոլոգիական համալսարանը:
Տվյալ համալսարանի ստեղծման համար արդեն իսկ ստացվել է Իսլամական հանրապետության Բարձր հեղափոխական խորհրդի թույլտվությունը: Ուսումնական նոր հաստատության առաջադրանքը լինելու է տեղեկատվական տեխնոլոգիաների ու նանոտեխնոլոգիաների ոլորտի մասնագետների պատրաստումը, օդատիեզերական ու միջուկային հետազոտությունների անցկացումը:
Մինչև քաղաքական կարիերան Ահմադինեժադը զբաղվել է գիտական գործունեությամբ ու դասավանդմամբ: Նա ավարտել է Թեհրանի գիտության ու տեխնոլոգիաների հեղինակավոր համալսարանը՝ տրանսպորտային ինժեների մասնագիտությամբ: 1997 թվականին նա պաշտպանել է իր թեկնածուական ատենախոսությունը:
Մահմուդ Ահմադինեժադի նախագահական լիազորություններն ավարտվում են օգոստոսի 4-ին՝ նորընտիր նախագահ Հասան Ռոուհանիի երդմնակալությունից հետո: Ահմադինեժադն Իրանի նախագահի պաշտոնը զբաղեցնում է 2005 թվականից:
