Քոնդոլիզա Ռայսը կդառնա Բիձինա Իվանիշվիլիի խորհրդատուն. Известия
Ռուսական Известия թերթի փոխանցմամբ՝ ԱՄՆ նախկին պետքարտուղար Քոնդոլիզա Ռայսը Վրաստանի նոր կառավարությանն առաջարկել է իր օգնությունը, որպեսզի Վրաստանի նոր իշխանությունները ավելի լավ «գլուխ հանի» վաշինգտոնյան կոնյուկտուրայից:
Քոնդոլիզա Ռայսը վրացական պատվիրակության հետ հանդիպել է Սթենֆորդի համալսարանում (Կալիֆոռնիա նահանգ), ուր նա աշխատում է որպես քաղաքագիտության պրոֆեսոր:
Հանդիպումից հետո Վրաստանի խորհրդարանի արտաքին կապերի հանձնաժողովի նախագահ Թեդո Ջափարիձեն հայտարարել է, որ դրանք լավ և ջերմ բանակցություններ էին: Նա հավելել է, որ Ռայսի գիտելիքներից ու փորձից օգտվելու նախաձեռնությունը ծագել է հենց Ռայսից:
Ջափարիձեի խոսքերով՝ Ռայսը խոստացել է աջակցել Ռուսաստանի հետ հարաբերությունների կարգավորմանը և արդեն իսկ ինչ-որ խորհուրդ է տվել՝ կապված տարածաշրջանային անվտանգության հետ:
Վրացական կողմի համար Ռայսի անձը հետաքրքրական է նաև նրանով, որ նա քաջատեղյակ է վերջին տարիներին Վրաստանում տեղի ունեցած իրադարձություններից, ինչը մասնավորապես առնչվում է 2008 թվականի ռուս-վրացական պատերազմին:
