ԱՄՆ կոնգրեսը նպատակադրվել է մինչև 2015 թվականն ամբողջովին վերջ դնել իրանական նավթի արտահանմանը
Ռուսական Интерфакс լրատվական գործակալության փոխանցմամբ՝ ԱՄՆ կոնգրեսը պատրաստում է Իրանի դեմ տնտեսական պատժամիջոցների նոր փաթեթ: Կոնգրեսի ներքին և վերին պալատների կողմից մշակվող օրինագծերով նախատեսվում է «սև ցուցակում» ներառել Իրանի հանքարդյունաբերական և շինարարական ոլորտների ձեռնարկությունները:
Բացի այդ, օրինագծերով նպատակ է դրվում մինչև 2015 թվականն ամբողջությամբ կասեցնել իրանական նավթի արտահանումը: Նախորդ տարի ուժի մեջ մտած ամերիկյան պատժամիջոցներն արդեն իսկ հանգեցրել են իրանական նավթի արտահանման կրկնակի կրճատմանը:
ԱՄՆ կոնգրեսի Ներկայացուցիչների պալատը կարող է օրինագիծն ընդունել մինչև օգոստոսյան արձակուրդներ: Սենատում քվեարկությունը տեղի կունենա սեպտեմբերից ոչ շուտ:
