Երեք շաբաթվա ընթացքում կանխվել է Եգիպտոսի պաշտպանության նախարարի դեմ ուղղված երկու մահափորձ
Ռուսական РИА Новости լրատվական գործակալության փոխանցմամբ՝ Եգիպտոսի անվտանգության ուժերը վերջին երեք շաբաթվա ընթացքում կանխել են պաշտպանության նախարար Աբդելֆաթթահ աս-Սիսիի դեմ երկու մահափորձ:
Ուժային կառույցներում առկա բարձրաստիճան աղբյուրը հայտնել է, որ այդ մահափորձերը պլանավորել էին ծայրահեղականները, որոնց աջակցել և հովանավորել են «Մուսուլման եղբայրներ» շարժումը:
Վերջիններս նպատակադրվել են նախագահի աթոռին վերադարձնել իսլամիստ Մոհամմեդ Մուրսիին: Առաջին մահափորձը պլանավորվել էր Հյուսիսային Սինայի մայրաքաղաք Էլ-Արիշի օդանավակայանի հարևանությամբ մեկ շաբաթ առաջ:
Զինյալները տեղեկատվություն են ստացել, որ նախարարը ժամանելու է Էլ-Արիշ՝ քննարկելու համար տարածաշրջանի անվտանգության իրավիճակը: Ծայրահեղականներն օդանավակայանի հարևանությամբ դարան են մտնում և հարձակվում են անցակետի վրա, սակայն աս-Սիսիի ժամանման լուրը չի հաստատվում, իսկ զինյալները ոչնչացվում են:
Երկրորդ մահափորձը պետք է իրականացվեր 4 օր առաջ Կահիրեում գտնվող «Ալ Իթթիհադիա» նախագահական պալատի հարևանությամբ, ուր կանոնավոր այցելում էր աս-Սիսին՝ խորհրդակցություններ անցկացնելու համար Եգիպտոսի ժամանակավոր նախագահ Ադլի Մանսուրի հետ:
Հանրապետական գվարդիայի զինծառայողների հագուստներով ծայրահեղականների խումբը, որն իր տրամադրության տակ է ունեցել շարժական հրթիռային համալիրներ՝ զրահապատ ավտոմեքենաներին հարվածելու համար, գաղտնի ժամանում է Կահիրե:
Սակայն հաջողվում է կանխել նաև այս մահափորձը, քանի որ ուժային կառույցների ներկայացուցիչները նախապես տեղեկատվություն են ստանում պատրաստվող հարձակման մասին և ձերբակալում են ծայրահեղականներին:
Հետաքննության տվյալներով՝ զինված խմբավորումները պլանավորել էին Եգիպտոսի պաշտպանության նախարարին վերացնելուց հետո հարձակումների շարք սկսել զինվորական ու ոստիկանական օբյեկտների, բանտերի վրա, զավթել Կահիրեի հեռուստակենտրոնը և հայտարարել «ժողովրդական օրինականության վերականգնման» մասին:
Դրանից հետո իշխանության պետք է վերադարձվեր գահընկեց արված նախագահ Մոհամմեդ Մուրսին: Ընդ որում, Պաշտպանության նախարարը հանգստությամբ է ընդունել իր դեմ պլանավորված մահափորձերի մասին լուրը, չի փոխել իր այցերի գրաֆիկը և հրաժարվել է ուժեղացնել իր թիկնազորը:
