Սիրիայի սահմանի մոտ օդ բարձրացված թուրքական ինքնաթիռները ստացել են «հարվածի՛ր» հրամանը
Թուրքական Vatan թերթի փոխանցմամբ՝ Դիարբեքիրի ռազմաօդային երկրորդ հրամանատարությունն օդ է բարձրացրել մարտական ինքնաթիռներ՝ կապված Թուրքիայի սահմանի մոտ Սիրիայի հյուսիսային շրջաններում ընթացող թեժ մարտերի հետ:
Խոսքը գնում է PKK-ի հետ կապված քրդական PYD-ի և «Ալ-Քաիդայի» հետ կապված «Ջաբհաթ ալ-Նուսրա» խմբավորման միջև ընթացող բախումների մասին: Թուրք-սիրիական սահմանի երկայնքով հետախուզական թռիչքներ իրականացնող թուրքական ինքնաթիռները ստացել են անհրաժեշտության դեպքում «հարվածելու» հրաման:
Արդեն երկու օր է, ինչ շարունակվում են սահմանամերձ գոտու բախումները: Քրդերն իրենց վերահսկողության տակ են առել Թուրքիայի սահմանին ամենամոտ գտնվող գյուղաքաղաքը՝ Ռաս ալ-Այնը:
Նշվում է, որ թուրքական կողմը սահմանի տվյալ հատվածում կենտրոնացրել է F-16 տիպի կործանիչներ և անօդաչու թռչող սարքեր, ինչպես նաև տանկեր: Սահմանվել է շուրջօրյա օդային և ցամաքային հսկողություն:
