Վրաստանում նախագահական մրցավազքից դուրս է մնացել երկու թեկնածու
Грузия Online-ի փոխանցմամբ՝ Վրաստանի ԿԸՀ-ում գրանցված նախագահի թեկնածուների քանակը կրճատվել է երկուսով: ԿԸՀ-ի տվյալներով՝ այսօրվա դրությամբ գրանցվել է 6 թեկնածու:
Նախագահական ընտրություններին մասնակցելու են նախաձեռնող խմբերի կողմից առաջադրված Միխայիլ (Գելա) Սալուաշվիլին, Նեստան Կիրտաձեն, Մամուկա Չոխոնելիձեն, Նիկոլոզ Գորգիջանիձեն, ինչպես նաև Լեյբորիստական կուսակցության առաջնորդ Շալվա Նաթելաշվիլին և Քրիստոնեա-դեմոկրատական շարժման առաջնորդ Գեորգի Տարգամաձեն:
Նախաձեռնող խմբերի կողմից առաջադրված Տարիել Խվեդելիձեն և Գեորգի Գախոկիան հանվել են գրանցումից՝ կապված նրանց փաստաթղթերում հայտնաբերված խախտումների հետ:
Վրաստանում նախագահական ընտրություններն անցկացվելու են հոկտեմբերի 27-ին: Մինչև սեպտեմբերի 17-ը նախագահի թեկնածուները պետք է ներկայացնեն իրենց համակիրների 26.000 ստորագրություն:
Նշվում է, որ դեռ հայտեր չեն ներկայացրել իր նախընտրական կամպանիան սկսած «Դեմոկրատական շարժում» կուսակցության առաջնորդ Նինո Բուրջանաձեն, իշխող «Վրացական երազանք» դաշինքի թեկնածու Գիորգի Մարգվելաշվիլին:
Ակնկալվում է նաև, որ «Միասնական ազգային շարժում» կուսակցությունը ներկայացնելու է Դավիթ Բաքրաձեի, իսկ ոչ խորհրդարանական ընդդիմությունը՝ երգիչ Պաատա Բուրչուլաձեի թեկնածությունը: Ակնկալվում է, որ կառաջադրվի նաև նախկին արտգործնախարար Սալոմե Զուրաբիշվիլիի թեկնածությունը:
