Ադրբեջանական ընդդիմությունը հերքել է Պուտինին դիմելու մասին տեղեկատվությունը
Ադրբեջանական Turan լրատվական գործակալության փոխանցմամբ՝ Ժողովրդավարական ուժերի Ազգային խորհուրդը (ԺՈՒԱԽ) հերքել է մի շարք ԶԼՄ-ներում շրջանառվող այն հաղորդագրությամբ, որ այդ կառույցը դիմել է Ռուսաստանի նախագահ Վլադիմիր Պուտինին՝ խնդրելով արագացնել ռուսական քաղաքացիությունից Ռուստամ Իբրահիմբեկովի դուրս գալու հարցը:
Դրա հետ կապված՝ ԺՈՒԱԽ-ի գործադիր ապարատի ղեկավար Էլդար Նամազովը հայտարարել է, որ այդ տեղեկատվությունը չունի որևէ հիմք: Նա հավելել է, որ ԺՈՒԱԽ-ի անունից կարող է խոսել միայն նրա ղեկավարը, գործադիր ապարատի ղեկավարը և մամուլի ծառայությունը:
ԺՈՒԱԽ-ի ղեկավար Ռուստամ Իբրահիմբեկովն Ադրբեջանի նախագահական ընտրություններում ընդդիմության միասնական թեկնածուն է: Նա ունի Ադրբեջանի ու Ռուսաստանի քաղաքացիություն:
Օրենքի համաձայն, Ադրբեջանի նախագահի թեկնածուն չի կարող ունենալ երկքաղաքացիություն, ինչի համար էլ Իբրահիմբեկովը դիմել է Ռուսաստանի իշխանություններին՝ կապված այդ երկրի քաղաքացիությունից դուրս գալու հետ:
