Գագիկ Բեգլարյանը «Իզոլյուքս Կորսան»-ից պահանջել է 100 տոկոսանոց որակ
ՀՀ տրանսպորտի և կապի նախարար Գագիկ Բեգլարյանն այսօր հանդիպել է «ԻզոլյուքսԿորսան» ընկերության ներկայացուցիչների հետ՝ Տարածաշրջանային նորանշանակ տնօրեն Խուան Մանուել Մորալեսի գլխավորությամբ, ով այդ պաշտոնում փոխարինում է Ռամոն Աիգեին։ Այս մասին տեղեկացնում է ՀՀ տրանսպորտի և կապի նախարարության լրատվական ծառայությունը։
«Իզուլյուքս կորսան» ընկերությունն իրականացնում է «Հյուսիս-հարավ ճանապարհային միջանցք» ներդրումային ծրագրի Տրանշ 1 և Տրանշ 2-ով նախատեսված շինարարարական աշխատանքները:
Նախարարն ընկերության նորանշանակ ղեկավարի առաջ հստակ խնդիր է դրել՝ աշխատանքներն արագ և որակով կազմակերպելու, թերությունները վերացնելու համար:
«Մենք պահանջելու ենք 100 տոկոսանոց որակ և սահմանված ժամկետներում աշխատանքների բարեհաջող ավարտ: Թույլ չենք տա, որ խոշոր ռազմավարական նշանակություն ունեցող պետական այս ծրագիրը վտանգի ենթարկվի»,-ընդգծել է նախարարը:
Գագիկ Բեգլարյանը ցանկություն է հայտնել Հայաստանում հանդիպել «Իզուլյուքս կորսան» ընկերության գլխավոր տնօրենին՝ «Հյուսիս-հարավ» ծրագրի իրականացման ընթացքում առաջացած խնդիրների լուծումները տեղում քննարկելու, ինչպես նաև հիմնական պատասխանատու անձ սահմանելու նպատակով:
Հանդիպմանը Խուան Մանուել Մորալեսը նախարարին ներկայացրել է շինարարական աշխատանքների ներկայիս ընթացքը: Նա նշել է, որ երկրորդ հատվածում կատարվում են հողի տեղափոխման աշխատանքներ, իսկ երրորդ հատվածում՝ բետոնհանգույցը և բետոնփռիչը պատրաստ են` առաջիկա օրերին կատարելու բետոնը փռելու վերջին փորձը:
