Երևան-Բեյրութ ուղիղ ավիաչվերթներ կիրականացվեն
Հուլիսի 5-ից մեկնարկում են Երևան-Բեյրութ ուղիղ ավիաչվերթներ: Դրանք տեղի կունենան շաբաթական 2 անգամ՝ երկուշաբթի և ուրբաթ: Բացման առիթով Հայաստան է ժամանելու լիբանանյան պաշտոնական ու գործարար շրջանակների մեծ ու ներկայացուցչական պատվիրակություն։
168.am-ին ՀՀ առևտրաարդյունաբերական պալատի լրատվական ծառայությունից հայտնեցին, որ հուլիսի 6-ին ժամը 12-ին ողջ պատվիրակությունը հյուրընկալվելու է ՀՀ առևտրաարդյունաբերական պալատում, ուր երկու երկրների առևտրաարդյունաբերական պալատների նախագահներ Մարտին Սարգսյանը և Մոհամադ Չոքերը ստորագրելու են համագործակցության համաձայնագիր։
Պատվիրակության կազմում են լիբանանյան MEA ավիաընկերության գլխավոր տնօրեն Մոհամեդ ալ-Հութին, Լիբանանի արդյունաբերության նախարար, ազգությամբ հայ Վրեժ Սաբոնջյանը, հայազգի նախկին նախարարներ և խորհրդարանի ներկայիս պատգամավորներ, Լիբանանի Կենտրոնական բանկի փոխնախագահ Հարություն Սամուելյանը, Լիբանանի Բանկերի ասոցիացիայի նախագահը, Լիբանանի արդյունաբերողների ասոցիացիայի նախագահը, բարձրաստիճան այլ պաշտոնատար այրեր, երկու երկրների դեսպանները, ընկերությունների ղեկավարներ, գործարարներ։
