Ումարովը Սոչիի Օլիմպիադան խափանելու կոչ է անում
Չեչեն իսլամիստ գրոհայինների առաջնորդ Դոկու Ումարովը կոչ է արել ջիհադիստներին հարձակումներ կազմակերպել մի շարք թիրախների վրա, որոնց թվում 2014 թվականի Սոչիի ձմեռային Օլիմպիական խաղերն են: Այս մասին հաղորդում է «Ազատություն» ռադիոկայանը:
Հարավային Կովկասի իսլամիստ զինյալների կայքէջում այսօր տեղադրված տեսանյութում Ումարովը «տարածաշրջանի եւ Ռուսաստանի այլ սուբյեկտների բոլոր մոջահեդ մարտիկներին» կոչ է արել «թույլ չտալ, որպեսզին սատանայական խաղեր անցկացվեն մեր նախնիների ոսկորների, շատ-շատ մահմեդականների ոսկորների վրա, որոնք մահացել եւ թաղվել են մեր տարածքում Սեւ ծովի ափերին»:
Ումարովը հայտարարել է նաեւ, թե վերացնում է ավելի վաղ Ռուսաստանում «ջիհադիստական» գործողությունների վրա իր սահմանած մորատորիումը, քանի որ «Կրեմլը ակնհայտորեն մեր բարի կամքը համարեց մեր թուլությունը»:
