Վրաստանի բնակիչներին հնարավորություն է ընձեռվել ծննդաբերել անվճար
Грузия Online-ի փոխանցմամբ` հուլիսի 1-ից սկսած` Վրաստանում ծննդաբերությունների ժամանակ ցուցաբերվող բժշկական օգնությունը դարձել է անվճար: Ընդ որում, դա վերաբերում է թե՛ բժշկական ապահովագրություն ունեցող, թե՛ այն չունեցող կանանց:
Սովորական ծննդաբերությունների համար նախատեսված է 500 լարի (300 դոլար), իսկ կեսարյան հատման դեպքում` 800 լարի (մոտ 500 դոլար) փոխհատուցում: Հուլիսի 1-ից Վրաստանում ընդլայնվում է նաև համընդհանուր բազային բժշկական ապահովագրությունը:
Այն տարածվում է նաև անհետաձգելի բժշկական օգնության ու բժշկական խորհրդատվության վրա, ինչպես նաև պլանային օպերացիաների վրա: Պլանային օպերացիաների տարեկան սահմանափակումը մեկ մարդու համար կազմելու է 15.000 (մոտ 9000 դոլար):
Ներկայումս Վրաստանում բժշկական ապահովագրման պետական ծրագրի շրջանակներում գրանցվել է մոտ 1.3 միլիոն մարդ: Բժշկական ապահովագրման ծրագիրը գործարկվել է այս տարեսկզբին:
