Գեղարդավանքի ավտոկայանատեղում ավտոմեքենան ինքնաբերաբար շարժվել և վրաերթի է ենթարկել երկու հոգու

Այսօր՝ հունիսի 17-ին, վրաերթ է տեղի ունեցել Կոտայքի մարզում: Ժամը 17:20-ի սահմաններում «ВАЗ 21 214» մակնիշի՝ 44 SU 999 համարանիշի ավտոմեքենան, ըստ նախնական տեղեկությունների, Գեղարդավանքի ավտոկայանատեղի տարածքում, առանց վարորդի կողմից վարելու, հետընթաց սկսել է շարժվել և հայտնվել է ձորում տեղակայված տաղավարում: Երկու հոգի՝ մեծահասակ մի կին և մի երեխա, թեթև մարմնական վնասվածքներով տեղափոխվել են «Սուրբ Գրիգոր Լուսավորիչ» բժշկական կենտրոն, քանի որ ավտոմեքենան բախվել է նրանց: Այս մասին տեղեկացնում է shamshyan.com-ը:

Այս պահին ժամանել են ՀՀ Արտակարգ Իրավիճակների նախարարության Փրկարար ծառայության թիվ 9 հրշեջ-փրկարարական ջոկատի 3-րդ խումբը՝ խմբի պետ Արտյոմ Բաբայանի գլխավորությամբ: Տեղում են նաև ոստիկանության Գառնիի բաժանմունքի օպերատիվ խումբը՝ բաժանմունքի պետի տեղակալ Գևորգ Համբարձումյանի գլխավորությամբ: Ժամանել են նաև Ճանապարհային ոստիկանության 2-րդ սպայական գումարտակի 3-րդ վաշտի 1-ին դասակի աշխատակիցները՝ վաշտի հրամանատարի տեղակալ Երվանդ Ալեքսանյանի գլխավորությամբ:

Ֆոտոլրագրողը հայտնում է, որ իր տեղեկություններով, նշված ավտոմեքենան հաշվառված է Երևանի Ավան վարչական շրջանի Խուդյակովի փողոցի բնակիչ 49-ամյա Արկադի Սեդրակյանի անվամբ և քիչ առաջ ոստիկանության Գառնիի բաժանմունքի աշխատակիցները պարզել են, որ ավտոմեքենան Ա. Սեդրակյանից գնել են և վարորդը եղել է Գառնի գյուղի բնակիչ Արծրուն Վարդանյանը, ով այդ պահին ավտոմեքենայում չի եղել, իսկ մեքենան կայանված է եղել ու ինքնաբերաբար հետընթաց շարժվել է: Արդեն դեպքի վայր են ժամանում Ոստիկանության Քննչական գլխավոր վարչության Կոտայքի մարզի քննչական բաժնի Կոտայքի քննչական բաժանմունքի քննիչները:

Ոստիկանությունը պարզում է հիվանդանոց տեղափոխված անձանց ինքնությունները: