Իրանը ժամանակավորապես փակել է Իրաքի և Թուրքիայի հետ իր սահմանները
Ադրբեջանական Trend լրատվական գործակալության փոխանցմամբ՝ Իրանը ժամանակավորապես փակել է իր երկու հարևանների հետ սահմանները: Խոսքը գնում է Իրաքի ու Թուրքիայի սահմանների մասին:
Դրանք փակվել են՝ ելնելով երկրում անցկացվող նախագահական ընտրությունների ժամանակ անվտանգության նկատառումներից: Այս մասին հայտարարել է Իրանի փոխարտգործնախարար Հոսեին Ամիր Աբդոլահիանը:
Վերջինիս խոսքերով՝ սահմանների փակումն իրականացվել է Իրաքին ու Թուրքիային սահմանակից երկրի երեք նահանգներում, որոնց ղեկավարները համապատասխան հարցով դիմել են Իրանի ՆԳՆ-ի Անվտանգության խորհրդին, որն էլ բավարարել է նահանգապետերի դիմումները: Աբդոլահիանը հավելել է, որ այդ նահանգներում իրականացվում են անվտանգության հավելյալ միջոցներ և վերահսկողություն:
Հիշեցնենք, որ ավելի վաղ չէր բացառվում, որ նախագահական ընտրությունների օրն Իրանը կարող է ամբողջովին փակել իր սահմանները:
