Ի՞նչ է արել Սերգո Կարապետյանը իր աշխատակցի հետ
Օրերս Կառավարության հետ հարցուպատասխանի ժամանակ ԱԺ ՀՅԴ խմբակցության պատգամավոր Աղվան Վարդանյանը ՀՀ գյուղատնտեսության նախարար Սերգո Կարապետյանին հարց էր ուղղել՝ Արմավիրի մարզում կարկտահարությունից տուժած գյուղացիներին աջակցելու վերաբերյալ: Ինչպես հայտնի է՝ պատգամավորի հարցին Սերգո Կարապետյանը պատասխանել էր՝ ընթերցելով նախապես պատրաստած ինչ-որ գրավոր տեքստ՝ պատճառաբանելով, թե հնչեցված հարցն իր համար սպասելի էր:
Սակայն Աղվան Վարդանյանը հայտարարեց, թե ինքն իր հարցերի պատասխաններն այդպես էլ չլսեց նախարարից՝ ասելով. «Ես առաջարկում եմ` Ձեր աշխատողը, որ այդ տեքստը գրել և Ձեր ձեռքն է տվել, հիմա վերադարձեք նախարարություն և ազատեք աշխատանքից: Ես Ձեզ կոնկրետ երեք հարց եմ տվել, իմ այդ հարցերին կոնկրետ պատասխանելու փոխարեն Դուք այստեղ ի՞նչ եք անում… Կարդում եք, որ ի՞նչ անեք»:
Այսօր լրագրողները Սերգո Կարապետյանից հետաքրքրվեցին՝ ի՞նչ արեցիք այն մարդու հետ, ով գրել էր այդ տեքստը, արդյոք ազատե՞լ եք նրան աշխատանքից:
Ի պատասխան Կարապետյանը նշեց. «Ոչ մի բան էլ չարեցի»:
