Պեկինը Տոկիոյին մեղադրել է տարածքներ առևանգելու մեջ
Ռուսական ИТАР-ТАСС լրատվական գործակալության փոխանցմամբ՝ Ճապոնիայի կառավարությունը կտրուկ դատապարտել է Չինաստանի Պետխորհրդի վարչապետ Լի Կեցյանին, ով հայտարարել էր, որ Տոկիոն պետք է վերադարձնի Չինաստանից առևանգած տարածքները:
Ճապոնիայի նախարարների կաբինետի գլխավոր քարտուղար Յոսիխիդե Սուգան Տոկիոյում տեղի ունեցած մամուլի ասուլիսի ժամանակ հայտարարել է. «Այդպիսի հայտարարությունները չափազանց անտեսում են պատմությունը: Մենք ոչ մի կերպ չենք կարող համաձայնվել նրա հետ»:
Նշվում է, որ Լի Կեցյանը Գերմանիա կատարած այցի ժամանակ երեկ հայտարարել է, որ Ճապոնիան Չինաստանից տարածքներ է առևանգել և չի ցանկանում վերադարձնել դրանք՝ թեև նա 1945 թվականին ընդունել է սեփական անվերապահ կապիտուլյացիայի մասին Պոտսդամի հռչակագրի դրույթները:
Չինաստանը Ճապոնիայից պահանջում է վերադարձնել Դյաոյույդաո (Սենկակու) կղզիները, որոնք Տոկիոն 1895 թվականին ներառել է իր կազմի մեջ: Ճապոնիան իր հերթին հայտարարում է, որ այդ կղզիները նախկինում չեն պատկանել ոչ ոքի:
