Վրաստանում ձերբակալել են Վանո Մերաբիշվիլիի նախկին տեղակալին և մի շարք ոստիկանների
Грузия Online-ի փոխանցմամբ՝ մայիսի 25-ի ուշ երեկոյան իրականացված հատուկ գործողության արդյունքում ձերբակալվել են Վրաստանի ներքին գործերի նախկին նախարարի (տվյալ ժամանակ Վանո Մերաբիշվիլիի) նախկին տեղակալ Գիյա Լորտկիպանիձեն և մի շարք նախկին ոստիկաններ:
Այդ մասին պաշտոնապես դեռ չի հայտարարվել: Որոշակի տվյալներով՝ պլանավորված է մոտ ժամանակներս ձերբակալել ոչ միայն Վրաստանի ՆԳՆ-ի նախկին բարձրաստիճան անձանց, այլև՝ Միասնական ազգային շարժում կուսակցության մի շարք առաջնորդների և նախկին իշխանության նախարարների:
Միևնույն ժամանակ Քութայիսի Վերաքննիչ դատարանը մերժել է Վանո Մերաբիշվիլիի փաստաբանների բողոքը՝ ուժի մեջ թողնելով Վանո Մերաբիշվիլիին նախնական երկամսյա կալանքի տակ պահելու մասին Քութայիսի քաղաքային դատարանի կայացրած որոշումը:
