Իրաքում դարձյալ պայթյուններ են որոտացել. կան զոհեր
Ամերիկյան Associated Press լրատվական գործակալության փոխանցմամբ՝ այսօր Իրաքում գրանցվել են մի շարք պայթյուններ: Պայթուցիկով բեռնված մի շարք ավտոմեքենաների պայթյունի հետևանքով զոհվել է առնվազն 27 մարդ:
Իրաքի մայրաքաղաք Բաղդադի շիական թաղամասերում այսօր պայթեցվել է պայթուցիկով լեցուն 5 ավտոմեքենա: Երկու պայթյուն էլ որոտացել է Իրաքի հարավում ընկած Բասրա քաղաքում՝ ռեստորանի ու ավտոբուսի կանգառի հարևանությամբ:
Նախորդ շաբաթ Իրաքում իրականացված ահաբեկչությունների հետևանքով զոհվել է մոտ 140 մարդ: Նրանց թվում կան թե՛ սուննիներ, թե՛ շիաներ:
ՄԱԿ-ի փորձագետների հաշվարկներով՝ այս տարվա ապրիլին ահաբեկիչների պատճառով Իրաքում զոհվել է ավելի քան 700 մարդ: Դա ամենամեծ ցուցանիշն է՝ 2007 թվականից սկսած, երբ երկրում թեժ պայքար էր ընթանում սուննիների ու շիաների միջև:
