Մեկնարկել է Էլեկտրոնային բովանդակության ազգային մրցույթը
Ձեռնարկությունների ինկուբատոր հիմնադրամը, որպես Համաշխարհային գագաթաժողովի մրցանակաբաշխության (WSA) միջազգային մրցույթի գործընկեր Հայաստանում, հայտարարում է էլ. բովանդակության ազգային մրցույթի մասին, որի նպատակն է՝ բացահայտել Հայաստանի էլ. բովանդակության ոլորտում զարգացումներն ու նվաճումները և հնարավորություն ընձեռել ներկայացնել դրանք միջազգային ասպարեզ: Այս մասին 168.am-ին տեղեկացնում են Ձեռնարկությունների ինկուբատոր հիմնադրամից:
Մրցույթին մասնակցել կարող է հայաստանյան ցանկացած ընկերություն կամ անհատ, որն ունի յուրահատուկ և գրավիչ էլ. բովանդակություն՝ թողարկված 2011-2013 թվականներին: Բոլոր աշխատանքները պետք է լինեն ավարտուն: Մրցույթին կարող են ներկայացվել ինչպես վեբ կայքեր, այնպես էլ մուլտիմեդիա աշխատանքներ (CD, DVD), մոբայլ հավելվածներ և խաղեր:
Աշխատանքները պետք է ներկայացվեն հետևյալ անվանակարգերից որևէ մեկում.
• Էլ. գործարարություն և առևտուր
• Էլ. կառավարում և բաց տվյալներ
• Էլ. ուսուցում և գիտություն
• Էլ. ժամանց և խաղեր
• Էլ. մշակույթ և զբոսաշրջություն
• Էլ. լրատվամիջոցներ և լրագրություն
• Էլ. առողջապահություն և շրջակա միջավայր
• Էլ. ներգրավում և հզորացում
Մրցույթի արդյունքում հաղթող են ճանաչվում յուրաքանչյուր անվանակարգում բացարձակ ցուցանիշներով (ամենաբարձր միավորներ հավաքած) լավագույն աշխատանքները: Հաղթողները ստանում են միջազգային մրցույթին (WSA) մասնակցելու ուղեգրեր, որի մրցանակաբաշխությունը տեղի կունենա Շրի Լանկայում:
էլ. բովանդակության ազգային մրցույթից հետո մասնակից երկրների փորձագետներից կազմված միջազգային ժյուրին Տալինում (Էստոնիա) կգնահատի աշխարհի տարբեր երկրներից ներկայացված աշխատանքները և կընտրի դրանցից լավագույն 40-ը: Մրցույթի յուրաքանչյուր անվանակարգի համար կընտրվի 5 աշխատանք: Այդ աշխատանքների ներկայացուցիչները կհրավիրվեն Շրի Լանկա՝ մասնակցելու Համաշխարհային գագաթաժողովի մրցանակաբաշխությանը (WSA) համաշխարհային կոնգրեսում և պայքարելու գլխավոր մրցանակի համար:
Մրցույթին մասնակցել ցանկացողները կարող են գրանցել իրենց հայտերը այս հղումով : Հայտերի ընդունման վերջնաժամկետն է 2013 թ. հունիսի 17-ը:
Տեղեկացնենք, որ Համաշխարհային գագաթաժողովի մրցանակաբաշխությունը (WSA) առաջին անգամ կազմակերպվել է 2003թ.-ին Զալցբուրգում, որպես ՄԱԿ-ի Տեղեկատվական հասարակության համաշխարհային գագաթաժողովի (WSIS) մի մաս: Այն համաշխարհային նախաձեռնություն է, որի նպատակն է՝ ընտրել և խթանել աշխարհի լավագույն էլեկտրոնային բովանդակությունը և նորարարական ՏՀՏ ծրագրերն ու աշխատանքները: Ավելի քան 160 երկիր արդեն ներգրավված է այս համաշխարհային մրցույթում:
Մրցույթի մասին առավել մանրամասն տեղեկատվություն ստանալու համար կարող եք այցելել այստեղ ՝ www.eif.am/arm/wsa-armenia:
