«Արմավիայի» տեղին առայժմ ոչ ոք չի հավակնում
Ավիափոխադրումներ իրականացնող որևէ ընկերություն այս պահի դրությամբ դեռ չի դիմել քաղաքացիական ավիացիայի գլխավոր վարչություն: Այս մասին «Փաստինֆո»-ի հետ զրույցում ասաց քաղավիացիայի վարչության մամուլի քարտուղար Նելլի Չերչինյանը:
Ինչպես արդեն տեղեկացրել էինք, այսօր լրանում է «Արմավիայի» հետ կառավարության պայմանագրի ժամկետը և, փաստորեն, այսուհետ այդ ընկերությանը բացառիկ իրավունքով հանձնված օդային ուղղությունների ճակատագիրը մնում է անհայտ, մինչև կառավարության հերթական որոշման կայացումը:
Նելլի Չերչինյանը նշեց նաև, որ քաղավիացիայի վարչությունը նոր մրցույթ չի հայտարարել, սակայն այստեղ սպասում են ավիաընկերությունների կողմից դիմումների և հույս ունեն մինչև այս շաբաթվա ավարտը ստանալ այդպիսիք:
Փաստորեն, միայն շաբաթվա ավարտին հայտնի կդառնան Հայաստանի հնարավոր օդային փոխադրողի վերաբերյալ նոր մանրամասներ: Ինչ վերաբերում է կառավարության կողմից ավիափոխադրումների շուկայի մասին նոր որոշման հավանականությանը, քաղավիացիայի մամուլի քարտուղարի խոսքով, իրենց վարչությունն այս պահի դրությամբ այդ հարցով որևէ առաջարկությամբ գործադրին չի դիմել:
