«Արմավիան» խաբո՞ւմ է ուղևորներին
Այսօր Երևանի Նալբանդյան 23 հասցեում գտնվող «Արմավիա» ավիաընկերության գրասենյակի մոտ էին հավաքվել այն ուղևորները, ովքեր «Արմավիայի» չեղյալ հայտարարված չվերթերի պատճառով հայտնվել են տհաճ իրավիճակում:
Հիշեցնենք, որ մարտի 29-ին ընկերությունը հայտարարել էր իր սնանկացման մասին` չեղյալ հայտարարելով Երևան-Մոսկվա, Երևան-Կրասնոդար, Երևան-Դուբայ չվերթերը:
Ուղևորների փոխանցմամբ` իրենց մի մասին ասել էին, որ ապրիլի 2-ին գան գրասենյակ և ստանան ավիատոմսի գումարը: Ուղևորները գնացել էին պայմանավորված ժամին, սակայն ոչ միայն պատասխան չէին ստացել, այլև գրասենյակի դուռը փակ էին գտել:
Նրանցից ոմանք իրենց բողոքն էին արտահայտել Կառավարության շենքի դիմաց, իսկ ոմանք էլ դեռ սպասում էին ընկերության պատասխանատուներին: Ուղևորները մտավախություն ունեն, որ ընկերությունը կարող է խաբել իրենց` չվճարելով ավիատոմսերի գումարները:
