Վրաստանը մերժել է ուժի չկիրառման մասին Ռուսաստանի առաջարկը. Կարասին
Новости-Грузия լրատվական գործակալության փոխանցմամբ՝ Վրաստանը մերժել է Ռուսաստանի առաջարկած փաստաթուղթը, որն առնչվում է մի կողմից Թբիլիսիի, իսկ մյուս կողմից Սուխումի ու Ցխինվալի միջև ուժի չկիրառմանը:
Այս մասին Ժնևում անցկացված Հարավային Կովկասի անվտանգության խնդիրների վերաբերյալ բանակցությունների 23-րդ փուլից հետո հայտարարել է այդ բանակցություններում Ռուսաստանի ներկայացուցիչ, փոխարտգործնախարար Գրիգորի Կարասինը.
«Առանձին ուշադրություն է հատկացվել ուժի չկիրառման մասին, քանի որ դա ժնևյան քննարկումների հիմնական առաջադրանքն է՝ Վրաստանի և Աբխազիայի ու Հարավային Օսիայի միջև ուժի չկիրառման մասին իրավաբանորեն պարտադրող փաստաթղթի ստորագրմանը հասնելը:
Դժբախտաբար, վրացական կողմը վերստին արգելափակել է այդ նախագծի վրա տարվող աշխատանքները և նախկինի նման պնդում է Ռուսաստանի կողմից ուժի չկիրառման մասին մի շարք միակողմանի պարտավորությունների շուրջ: Դա սկզբունքայնորեն անընդունելի է մեզ համար: Դրանով իսկ նրանք արգելափակում են գործընթացը»:
